काठमाडौं– नेपाली कांग्रेसका सांसद राजेन्द्र बजगाईंले दुर्गम क्षेत्र र पछाडि पारिएको समुदायबाट एसईई उत्तीर्ण गरेका दुई जनालाई छात्रवृत्तिमा पढाइने बताएका छन् । 

उनले एक्स (ट्विटर) मा पोस्ट गर्दै उच्च शिक्षामा अवसर खोज्दै गरेका विपन्न तथा दुर्गम क्षेत्रका विद्यार्थीहरूका लागि छात्रवृत्तिको अवसर भएको बताएका हुन् । 

बजगाईंले काठमाडौंमा विज्ञान तथा व्यवस्थापन विषयमा अध्ययन गराउने एक प्रतिष्ठित कलेजका सञ्चालकले दुई जना योग्य विद्यार्थीहरूका लागि पूर्ण छात्रवृत्ति सीट उपलब्ध गराउने पनि उल्लेख गरेका छन् । 

‘तपाईँलाई यस्तो विद्यार्थीको जानकारी छ– विशेषगरी दुर्गम क्षेत्र वा पछाडि पारिएको समुदायबाट जसले एसईई उत्तीर्ण गरेका छन् र उच्च शिक्षामा अवसर खोज्दैछन् भने, कृपया विद्यार्थीको विवरण छिटोभन्दा छिटो इमेल ठेगानामा पठाउनुहोस्,’ उनले लेखेका छन् । 

सांसद बजगाईंलाई raj@gurkhaencounters.comमा विवरण उपलब्ध गराउन सकिने छ । उनले छात्रवृत्ति उपलब्ध गराउने काठमाडौंको क्याम्पसको नाम भने खुलाएका छैनन् ।