दाङ– सबैभन्दा धेरै महिला हिंसा श्रीमानबाटै हुने गरेको तथ्याङ सार्वजनिक भएको छ । महिला पुनर्स्थापना केन्द्र (ओरेक) ले लुम्बिनी प्रदेशको दाङ जिल्लामा गरेको सर्वेक्षणमा महिलाहरू आफ्नै श्रीमानबाट हिंसामा परेको देखाएको छ । 

ओरेकले महिला हिंसा सम्बन्धी कुल ३१ वटा लैङ्गिक विभेदमा आधारित हिंसाको तथ्याङ्क अभिलेखीकरण गरेको थियो ।

जनवरीदेखि मार्च २०२५ सम्म अर्थात् ३ महिनाको प्रतिवेदन अनुसार  ८१ प्रतिशत (२५ जना) महिला घरेलु हिंसाबाट प्रभावित भएको देखिन्छ । जसमा अधिकांश घटनामा आरोपितहरू प्रभावित महिलाका आफ्नै जीवनसाथी अर्थात् श्रीमान् रहेका छन् ।

सामाजिक रूपमा महिलाको सुरक्षाको पहिलो अपेक्षित स्थान मानिने परिवारभित्रै महिलाहरू असुरक्षित रहनु गम्भीर चिन्ताको विषय हो ।

यस्ता घटनाहरू केवल दाङ जिल्लासम्म सीमित छैनन् । नेपाल प्रहरीको यस आर्थिक वर्ष सार्वजनिक वार्षिक तथ्याङ्क अनुसार पनि देशभर वार्षिक रूपमा १६ हजारभन्दा बढी महिला घरेलु हिंसाबाट प्रभावित हुने गरेका छन् ।