काठमाडौं– पाकिस्तानमा पेट्रोलियम पदार्थको मूल्य बढ्ने भएको छ । संसारभर कच्चा तेलको मूल्य बढेको भन्दै पाकिस्तान सरकारले पेट्रोलियम पदार्थको मूल्य बढाउन लागेको हो ।

पाकिस्तानबाट प्रसारण हुने समा टिभीका अनुसार सरकारले पेट्रोलको मूल्यमा प्रतिलिटर ३ रुपैयाँले वृद्धि गर्ने तयारी गरिरहेको छ । त्यसैगरी, डिजलको मूल्यमा ६ रुपैयाँ वृद्धि हुने जनाइएको छ ।

हाल पाकिस्तानमा पेट्रोलको मूल्य २ सय ५६ रुपैयाँ १३ पैसा प्रतिलिटर तोकिएको छ भने डिजलको मूल्य २ सय ६० रुपैयाँ ९५ पैसा रहेको छ । पछिल्लो समय आर्थिक समस्यामा फसेको पाकिस्तानमा उच्च मूल्यवृद्धि देखिएको छ ।

पेट्रोलियम पदार्थमा मूल्य वृद्धिसँगै पारवहन खर्च पनि बढ्ने र त्यसले अन्य वस्तुको मूल्य पनि बढाउने चिन्ता व्यक्त गरिएको छ । पाकिस्तानमा जारी आर्थिक समस्याको सबैभन्दा ठूलो असर निम्न वर्गका जनतामा परेको जनाइएको छ ।