काठमाडौं – संघीय निजामती विधेयकमा व्यवस्था गरिएको कुलिङ अफ पिरियड सम्बन्धमा संसदमा पेश गर्दा मूल मर्मलाई भत्काउने गरी तोडमोड गरिएको विषयमा छानबिन समिति गठन गर्ने राज्य व्यवस्था तथा सुशासन समितिको निर्णय लगत्तै सभामुखले छानविन समितिबारे परामर्श सुरु गरेका छन्।

सभामुख घिमिरेले समितिका सभापति रामहरि खतिवडा, एमालेका प्रमुख सचेतक महेशकुमार बर्तौला, नेपाली कांग्रेसका प्रमुख सचेतक श्यामकुमार घिमिरे, माओवादी केन्द्रका हितराज पाण्डे, र राष्ट्रिय स्वतन्त्र पार्टीका प्रमुख सचेतक सन्तोष परियारसँग छलफल गरेका हुन्।

छलफलका क्रममा सम्भावित छानबिन समितिको संरचना (मोडालिटी) र कार्यादेश (टीओआर) बारे प्राथमिक कुराकानी भएको जनाइएको छ। नेताहरूले प्रधानमन्त्री विदेशमै रहेका कारण, उनी स्वदेश फर्किएपछि शीर्ष नेताहरूको सहमतिमा समिति गठन गर्न सुझाव दिएका छन्।

साथै, संसद सचिवालयका महासचिव पद्मप्रसाद पाण्डेयले सचिवालयका सचिव डा रोजनाथ पाण्डेलाई आवश्यक प्रशासनिक छानबिन र सम्बन्धित कागजातहरू अभिलेखिकरणको जिम्मा दिइएको जानकारी सभामुखलाई गराइएको छ।