काठमाडौं– नेपाली कांग्रेसका नेता मोहनबहादुर बस्नेतले महामन्त्री गगनकुमार थापाकै कारण अख्तियार दुरुपयोग अनुसन्धान आयोगले छानबिन अघि बढाएको दाबी गरेका छन् । 

कांग्रेसको केन्द्रीय कार्यसमितिको बुधबारको बैठकमा उनले अख्तियारले महामन्त्री थापाकै कारण आफूमाथि छानबिन अघि बढाएको दाबी गरेका हुन् । 

बैठकमा सहभागी एक केन्द्रीय सदस्यले नेता बस्नेत महामन्त्री थापाप्रति आक्रोशित ढंगले प्रस्तुत भएको जानकारी दिए । 

‘महामन्त्री गगन थापा टेरामक्स प्रकरणमा मविरुद्ध खुलेरै लाग्नुभयो । बाहिर पनि लाग्नुभयो,’ बस्नेतको भनाइ उद्धृत गर्दै ती नेताले खबरहबसँग भने, ‘संसद्मा पनि मेराविरुद्ध लाग्नुभयो । तपाईंकै कारणले मेराविरुद्ध अख्तियारले छानबिन गर्‍यो ।’

ती केन्द्रीय सदस्यका अनुसार नेता बस्नेतले ढिलो–चाँडो सबैको पालो आउने चेतावनीसमेत दिए । 

‘ढिलोछिटो पालो सबैको आउँछ,’ बस्नेतले बैठकमा आक्रोश पोखे, ‘कोही चोखो हुने वाला छैन ।’
 
अख्तियारले उनीविरुद्ध टेरामक्स प्रकरणमा अनुसन्धान अघि बढाएर विशेष अदालतमा मुद्दा दायर गरेको थियो । उनलाई अदालतले २५ लाख धरौटी लिएर तारेखमा छाड्न आदेश दिएको छ ।