काठमाडौं- प्रधानमन्त्री केपी शर्मा ओलीले भिजिट भिसामा सेटिङ गरेर दैनिक लाखौँ उठाइएको प्रकरणमा मुछिएका गृहमन्त्री रमेश लेखकको फेरि बचाउ गरेका छन् ।

सोमबार संघीय संसद् भवन नयाँ बानेश्वरको ल्होत्से हलमा बसेको एमाले संसदीय दलको बैठकलाई सम्बोधन गर्दै उनले गृहमन्त्रीको राजीनामाको मागसहित आन्दोलित विपक्षीलाई कडा कटाक्ष पनि गरे ।

‘यस्तो नचाहिँदाो कुरामा संसद्लाई रोकेर, देशको विकासमा अवरोध गर्ने, जनताका प्रतिनिधिलाई निष्प्रभावी गर्ने र असफल बनाउने काममा विपक्षीहरू लाग्नु भएको छ । यो हुँदैन नहुने काम भएको छ’, उनले भने, ‘विपक्षीहरूले केही नपाएर गृहमन्त्रीको राजीनामा मागेका छन् । केही न केही तथ्य र प्रमाणले बोल्नु त पर्‍यो नि, गृहमन्त्रीलाई छुनु त पर्‍यो नि, उहाँलाई केहीले छोएको छैन ।’

ओलीले त्रिभुवन विमानस्थल अध्यागमन कार्यालय प्रमुख तीर्थराज भट्टराईलाई अख्तियार दुरूपयोग अनुसन्धान आयोगले बयान लिँदैमा गृहमन्त्रीले राजीनामा दिनुनपर्ने बताए ।

‘गृहमन्त्रीलाई केहीले छुनुपर्‍यो, उहाँविरुद्ध तथ्य हुनुपर्‍यो । एउटा कर्मचारीलाई अख्तियारले सोधपुछ गर्‍यो, बयान लियो भनेर गृहमन्त्रीको राजीनामा मागेका छन्’, उनले भने, ‘अख्तियारले ती कर्मचारीलाई के सोध्यो थाहा छैन, बयान पनि राम्रोसँग लिएको छैन । तर विपक्षीहरू हामीलाई रिस उठेको छ, गृहमन्त्रीले राजीनाम दिनुपर्‍यो भनिरहेका छन ।’

उनले अब यसरी संसद् अवरोध नसहने बताए । ‘यसरी चल्दैन । जहिले पनि संसद् अवरोध, जहिले पनि संसद् अवरोध । दुईजना उठ्यो करायो, हल्ला गर्‍यो संसद् अवरोध अब हुँदैन । उहाँहरू कराउनुहोला तर अब सहन सकिँदैन’, ओलीले भने, ‘उहाँहरूको ज्यादती धेरै भयो, अब सहन सकिँदैन । उहाँहरूलाई सडक पनि चाहिएको छ, बाटो अवरोध पनि गर्नुपरेको छ, संसद्‍मा पनि बितण्डा मच्चाएको छ । अब यसरी सहन सकिँदैन, संसद् चल्छ ।’