काठमाडौं- नेपाली कांग्रेसको पन्ध्रौँ महाधिवेशन पुस २६ देखि २८ गतेसम्म हुने भएको छ।

करिब डेढ महिनाको रस्साकस्सीपछि सोमबार बसेको केन्द्रीय कार्यसमिति बैठकले यस्तो निर्णय गरेको प्रवक्ता डा. प्रकाशशरण महतले बताएका छन् ।

१५औं महाधिवेशन र विशेष महाधिवेशनको विवादबीच केन्द्रीय कार्यसमिति बैठक ४० दिनभन्दा बढी चलेर पनि कांग्रेस अनिर्णयको बन्दि भएको थियो ।

तर लामो छलफलपछि संस्थापन पक्षले पुस मसान्तभित्रै महाधिवेशन गर्ने गरी सोमबार तालिका पेश गरेको थियो । महाधिवेशनको उक्त कार्यतालिकालाई सोमबारको बैठकले सर्वसम्मत पारित गरेको महतले बताएका छन् ।

महतले महाधिवेशनका लागि क्रियाशील सदस्यको प्रारम्भिक छानबिन समितिले गरेको निर्णयउपर परेको निवेदन केन्द्रीय कार्यसमिति समितिमार्फत् छानबिन समितिमा जाने बताएका छन् ।

नयाँ सदस्यता र नवीकरणसम्बन्धी परेका निवेदन उपर परेका उजुरीको छानबिन गरी केन्द्रीय कार्यसमितिमा बुझाउने मिति पुस १४ गतेलाई तोकिएको उनले बताए।

नयाँ र क्रियाशील सदस्यता वितरण गर्दा समावेशिताको ख्याल गरिने उनले बताए । पार्टी प्रवेश गरेकाहरूलाई पनि क्रियाशील सदस्यता दिएर मात्रै महाधिवेशनमा जाने बताए ।

उनले वर्तमान कार्यसमितिको म्याद मंसिर २३ गतेसम्म रहेकाले त्यसको म्यादलाई माघसम्म थपिएको पनि जानकारी दिए । पुसमा महाधिवेशन भए पनि एक महिनाको ग्रेस राखेर म्याद थपिएको उनले जानकारी दिएका छन् ।