झापा– झापास्थित बिरिङ खोलाको पुलमुनि भेटिएको शव  शिवसताक्षी– १० माईधारका ३३ वर्षीय सरोज शर्माको रहेको पुष्टि भएको छ ।

आफ्नो सवारीसहित बेपत्ता भएका शिवसताक्षी नगरपालिका–१० सन्थाल बस्तीका ३२ वर्षीय शर्माको शव झापा गाउँपालिका–५ स्थित हुलाकी राजमार्गनजिक बिरिङ खोला पुलमुनि गाडिएको अवस्थामा शनिबार फेला परेको छ ।

सरोजको शव भेटिएको बिरिङ खोलाको पुलमुनि प्रहरी पुगेर घटनास्थलको जाँच प्रकृति मुचुल्का गरिरहेको छ । उनको शवलाई पोस्टमार्टम गर्न अस्पताल पठाउने तयारी भइरहेको छ ।

सरोजको मृत्यु के–कसरी भयो भन्ने अनुसन्धानकै क्रममा रहेको जिल्ला प्रहरी कार्यालय झापाले जनाएको छ । तर गाडिएको अवस्थामा भेटिएकाले उनको हत्या भएको प्रारम्भिक निष्कर्ष प्रहरीले निकालेको छ।

उनी गत आइतबारदेखि कारसहित बेपत्ता भएका थिए ।  तीन दिनअघि बुधबार मात्रै उनको कार चारआली जंगलमा आगजनी गरिएको अवस्थामा फेला परेको थियो ।

झापाको मेचीनगर १३  चारआली भद्रपुर रोड क्षेत्रमा पर्ने  हातेमालो सामुदायिक वन जंगलभित्र आगजनी गरिएको अवस्थामा उक्त कार फेला परेको थियो । दुवै घटनाको छानबिन अहिले जिल्ला प्रहरी कार्यालय झापाको टोलीले गरिरहेको छ ।