काठमाडौं– नेकपा एमालेका पोलिटब्युरो सदस्य गोकुल बास्कोटाले फुटिसकेपछि एकताको आवश्यकता याद गर्नु वाहियात भएको बताएका छन् ।

माधवकुमार नेपाल नेतृत्वको नेकपा एकीकृत समाजवादीले नेकपा माओवादी केन्द्रसँग एकताको निर्णय गरेपछि बास्कोटाको यो भनाइ आएको हो ।

समाजवादीले माओवादीसँग एकताको निर्णय गरेपछि एमाले अध्यक्ष केपी शर्मा ओलीले शुक्रबार घर छाडेर गएकालाई फर्किन आह्वान गरेका थिए ।

पूर्वसञ्चारमन्त्री समेत रहेका बास्कोटाले ओलीको उक्त आह्वानप्रति पनि कटाक्ष गरेका छन् ।

उनले सामाजिक सञ्जालमा लेखेका छन् ‘फुटेपछि एकताको आवश्यकता याद गर्नु वाहियात हो । तर नेपालका वामपन्थीहरू त्यही प्रवृत्तिबाट अभिशप्‍त छन्, मिसिने तर नमिल्ने हिन्द र प्रशान्त महासागर जस्ता।’

मिलेर पनि नमिल्नुका कारणका रूपमा उनले गहिराइको चाप र नेतृत्वको राप भनेका छन् ।

‘फुटभन्दा जुट राम्रो तर ढोक्सामा परेको माछी नहुनु, अर्कोले तारेर खाए वा सुरुवा बनाएर पिए पनि हुने’, उनले माधवकुमार नेपालतिर लक्षित गर्दै भनेका छन् ।