काठमाडौं– नेकपा एमालेका उपाध्यक्ष सुरेन्द्र पाण्डेले एमालेभित्रको लोकतान्त्रीकरणसम्बन्धी बहस सबै दलको साझा मुद्दा रहेको बताएका छन् । 

‘नेकपा एमालेको लोकतान्त्रीकरण’ विषयक अन्तरसंवाद कार्यक्रममा बोल्दै उनले उमेर सीमा र कार्यकालसम्बन्धी प्रावधानलाई प्राविधिक तर आवश्यक विषयका रूपमा प्रस्तुत गर्दै आगामी महाधिवेशनमा यसबारे छलफल हुने जानकारी दिए ।

पाण्डेले भने, ‘उमेर भनेको प्राविधिक कुरा मात्रै हो, तर यसबारेमा बहस र निर्णय आवश्यक छ । अहिले एमालेको बहुमतले उमेर हदलाई हटाउने निर्णय गर्न सक्छ । तर बहुमतले सधैं सही निर्णय गर्छ भन्ने हुँदैन ।’

उनले पार्टीमा उमेर हद तत्काल लागू नभए पनि भविष्यमा यो आवश्यक रूपमा कार्यान्वयन हुने बताए । ‘कतिपय बेला अल्पमतमा परेको एजेन्डा हराउँदैन । मदन भण्डारी पनि कहिलेकाहीँ अल्पमतमा थिए। अहिले उमेर हदको मुद्दा स्थापित हुन नसके, एक दिन लागू हुन्छ,’ पाण्डेले स्मरण गरे ।

उनले लोकतान्त्रीकरण एमालेको मात्र नभई सबै दलको आवश्यकता भएकोमा जोड दिए । ‘यदि पार्टी अध्यक्षलाई दुई कार्यकाल मात्र हुने व्यवस्था भए के हुन्थ्यो ? यो एमालेको मात्र प्रश्न होइन, सम्पूर्ण दलहरूको मुद्दा हो,’ पाण्डेले भने ।

पाण्डेले महाधिवेशन नजिकिँदै गर्दा उमेर र कार्यकालसम्बन्धी विषयलाई मिलाएर ल्याइएको भए पनि अन्तिम निर्णय महाधिवेशनले नै गर्ने बताए ।