काबुल– अफगानिस्तानको शरणार्थी समस्या समाधान उच्च आयोगले दिएको जानकारीअनुसार, एकै दिनमा तीन हजार २८४ परिवारका १३ हजार २९ जना नागरिक छिमेकी मुलुक इरान र पाकिस्तानबाट स्वदेश फर्किएका छन् ।

उनीहरू पश्चिम हेरात प्रान्तको इस्लाम कला नाका, पूर्वी नंगरहारको तोर्खम नाका, दक्षिण कन्धारको स्पिन बोल्दाक नाका तथा पश्चिमी निमरोजको अब्रीशम नाका हुँदै अफगान भूमि प्रवेश गरेका हुन् ।

संयुक्त राष्ट्र सङ्घीय शरणार्थी उच्चायोगको पछिल्लो विवरणअनुसार, सन् २०२५ को सुरुयता हालसम्म १२ लाखभन्दा बढी अफगानी नागरिकहरू इरान र पाकिस्तानबाट स्वदेश फर्किसकेका छन् ।

हाल झण्डै ७० लाख अफगानी शरणार्थी विदेशमा रहेका छन्, जसमा धेरैजसो व्यक्तिहरू कागजपत्रविहीन अवस्थामा इरान र पाकिस्तानमा बसोबास गरिरहेका छन् ।

यी दुवै मुलुकका अधिकारीहरूले अवैध रूपमा बस्दै आएका विदेशी नागरिकहरूलाई आफ्नो देश फर्कन बारम्बार आग्रह गर्दै आएका छन् ।