काठमाडौं– नेपाली कांग्रेसका सांसद विनोद चौधरीले नेता डा. शेखर कोइरालालाई जवाफ फर्काएका छन् ।

कोइरालाले सोमबार केन्द्रीय कार्यसमिति बैठकमा आफूमाथि लगाएको लाञ्छनाको चौधरीले मंगलबारको बैठकमा जवाफ दिएका हुन् ।

‘उहाँले हिजो प्रश्न उठाउनु भयो, विनोद चौधरीजस्तो मान्छेलाई चार वर्षअगाडि नीति नियम मिचेर केन्द्रीय समितिमा ल्याउनु गलत निर्णय थियो,’ उनले भने, ‘म उहाँलाई जानकारी गराउन चाहन्छु, त्यो सारा विधि पूरा गरेर, पार्टीको नियम, अर्को पार्टीबाट आएको पृष्ठभूमि, त्यसको कानुनी परिपेक्ष, पार्टीको कानुन विभागको विश्लेषण, त्यसपछिको निर्ण र कोर्टलेसमेत गरेको निर्णय अनुसार भएको हो ।’

कोइरालाले आफूमाथि गरेको प्रश्नले निजी क्षेत्रका आफूजस्ता मान्छेहरूको भूमिकाबारे पनि चौधरीले पार्टीबाट जवाफ खोजे ।

‘यी सबैबाट सफाइ प्राप्त व्यक्ति र त्यसभन्दा महत्वपूर्ण यसले एउटा फेरि पनि नयाँ प्रश्न के उठाउँदै गइरहेको छ भने यो पार्टी हाँक्ने जमर्को गर्ने नेताहरूको दृष्टिकोणमा निजी क्षेत्रका हामीजस्ता मान्छेको भूमिका के हो ?,’ चौधरीले सोधे, ‘कि सधैँ हामीले कन्फ्लिक्ट अफ इन्ट्रेस्टको नाममा अनुभव बोकेकालाई छेक्ने नै हो कि ?’

नेता चौधरीले आफूलाई गत निर्वाचनमा हराउन भूमिका निर्वाह गरेका नेताहरू बोकेर पार्टीको नेतृत्व गर्ने सपना कोइरालाले देखेको पनि बताए ।

‘घर–घर गएर पार्टीको आधिकारिक उम्मेदवारको विरोधमा हृदयश त्रिपाठीका लागि ठाउँ–ठाउमा, बुथ–बुथमा मान्छे राखी पार्टीका शीर्षस्थ नेतालाई तथानाम गाली गरी हराउन हरप्रयास गर्ने लुम्बिनी प्रदेश महामन्त्रीमा आशिन भएर बस्नेलाई बोकेर हिँड्ने नेताले यो पार्टीलाई हाँक्ने हो भोलिको दिनमा ?,’ उनले कोइरालालाई प्रश्न गरे ।

यसअघि नेता कोइरालाले सोमबार केन्द्रीय सदस्यका लागि नेता चौधरीको योग्यताबारेमा प्रश्न गरेका थिए ।

‘विनोद चौधरीको केन्द्रीय सदस्य बन्ने योग्यता थियो कि थिएन ? त्यो हेरियो ? क्रियाशीलको १० वर्षे अवधि पुग्थ्यो ?,’ उनले प्रश्न गर्दै भनेका थिए ।

कोइरालाले पहिलो पटक गिरिजाप्रसाद कोइरालासँग शेरबहादुर देउवाले सभापतिमा प्रतिस्पर्धा गर्ने क्रममा सुजाता कोइरालाको केन्द्रीय सदस्य लड्ने इच्छा भए पनि योग्यताका कारण नपाएको स्मरण गराएका थिए ।