काठमाडौं– नेपाली कांग्रेसका केन्द्रीय सदस्य अजयबाबु शिवाकोटीले निजामती सेवा विधेयकमा गरिएको  छेडखानीप्रति गम्भीर आपत्ति जनाएका छन् । 

प्रतिनिधिसभाबाट दुई वर्षे कुलिङ पिरियडको स्पष्ट व्यवस्थासहित पारित भइसकेको विधेयकमा मर्मविपरीत गरिएको छेडखानीलाई उनले ‘संसद्को अपमान’ भनेका छन् ।

सामाजिक सञ्जाल फेसबुकमार्फत् नेता शिवाकोटीले केही व्यक्तिको साँघुरो स्वार्थका लागि विधेयकमा तोडमोड गरिएको टिप्पणी गरेका छन् । ‘लोकतान्त्रिक विधि र संसद्प्रतिको विश्वासमाथि ठाडो प्रहार भएको छ,’ उनले लेखेका छन् ।

विधेयकको मर्मविपरीत छलछाम गरी संसद्लाई गुमराहमा राखिएको भन्दै शिवाकोटीले यस्तो कार्य नागरिकको विश्वासमाथिको धोका भएको टिप्पणी गरेका छन् । ‘संसद्लाई बुख्याचा बनाउने यस्ता चलखेल अब सैह्य छैन,’ उनले लेखेका छन् । 

शिवाकोटीले संसद्मा पारित विधेयकमा भएको छेडखानीबारे छानबिन गरी संलग्न सबैलाई कानुनी दायरामा ल्याउनुपर्ने मागसमेत गरेका छन् । ‘संसदीय प्रणालीको रक्षा गर्न आजैबाट संसद्को निर्णय उल्ट्याउने प्रवृत्तिलाई रोकिनुपर्छ,’ उनले भनेका छन् ।