काठमाडौं – स्पेनसँगको सम्बन्ध अझ मजबुत हुँदै गएको भारतले जनाएको छ । स्पेनी प्रधानमन्त्री पेद्रो सान्चेजको भारत भ्रमणका क्रममा भारतीय विदेश मन्त्रालयले दुई मुलुकबीचको सम्बन्ध थप मजबुत हुँदै गएको जनाएको हो ।

भारतीय विदेश मन्त्रालयका सचिव (पश्चिम) तनमय लालले युरोपेली युनियन ईयूमा स्पेन भारतको निकट साझेदार रहेको उल्लेख गरे ।

भारतीय समाचार संस्था एएनआईका अनुसार स्पेन ईयूको पाचौँ र विश्वको १५ औँ ठूलो अर्थतन्त्र हो । हाल स्पेनले ईयूको अध्यक्षता गरिरहेको छ । त्यसबाहेक स्पेन विश्वको १० ठूला रक्षा उपकरण निर्यातकर्ता मुलुकको सूचीमा पनि आउँछ ।

प्रधानमन्त्री सान्चेजको भारत भ्रमणबाट दुई मुलुकबीच सुमधुर बन्दै गएको सम्बन्धमा नयाँ आयाम थप्ने भारतीय विदेश मन्त्रालयले विश्वास व्यक्त गरेको छ । आगामी दिनमा दुई मुलुकबीच सूचना प्रविधि, रयासन, ऊर्जा, औषधिजस्ता क्षेत्रमा सहकार्य थप बढ्दै जाने मन्त्रालयको अपेक्षा छ ।