काठमाडौं- राष्ट्रिय प्रजातन्त्र पार्टीका अध्यक्ष राजेन्द्र लिङ्देनले अस्थिरताका कारक दलहरू नै अहिले सरकारमा रहेको बताएका छन् ।

राप्रपा केन्द्रीय सल्लाहकार समितिको बैठकलाई शुक्रबार काठमाडौंमा सम्बोधन गर्दै लिङ्देनले ठूलो दलका रुपमा मत पाएर अहिले सरकारमा रहेका दल नै अस्थिरताको प्रमुख कारक भएको बताए ।

उनले अहिले ठूला दलहरू मिलेर दुई दलीय व्यवस्था कायम गर्ने परिकल्पना सामान्य विषय नभएको जिकिर गरे ।

लिङ्देनले सत्ताको दुरुपयोग भएकै कारण मुलुकमाथि उठ्न नसकेको बताए । अब पनि राप्रपाजस्तो पार्टी शक्ति बलियो बनेर नआए देश दीर्घकालीन निराशाको खाडलमा गएर अराजकता आउनले उनले बताए ।

अहिले अभिभावकको रिक्ततालाई राप्रपाले नेतृत्व लिएर अन्त्य गर्नुपर्नेमा उनले जोड दिए । लिङ्देनले अहिलेको प्रणालीमा परिवर्तन गर्नुपर्ने भएकाले राप्रपाले ठीक ढंगले आफूलाई अघि बढाउनुपर्ने उल्लेख गरे ।

राप्रपा पनि निष्क्रियय भए देशका लागि दुर्भाग्य हुने उनले बताए । सदनमा राप्रपाले ठीक ढंगले आफ्नो काम गरिरहेको जिकिर पनि लिङ्देनले गरेका छन् ।