एजेन्सी – पश्चिम अफ्रिकी मुलुक मालीमा गर्मी ह्वात्तै बढ्दा दूधभन्दा बरफ महँगो पर्न थालेको छ । गर्मीले नागरिकलाई आलसतालस बनाएपछि त्यहाँ दूध र पाउरोटी भन्दा आइसक्युब (बरफको टुक्रा) को भाउ महँगिएको हो ।

राजधानी बमाको शहरका पसलहरूमा बरफ किन्ने नागरिकको भीड लाग्न थालेको अन्तरराष्ट्रिय मिडियाहरूमा खबर छ । आवश्यक मात्रामा बिजुली नहुँदा त्यहाँ चर्को लोडसेडिङका कारण नागरिकले पङ्खा समेत चलाउन सकिरहेका छैनन् । तारन्तार बिजुली जाँदा मालीका नागरिकले घरको फ्रिजसमेत चलाउन नपाएका हुन् ।

चाँडै सड्ने खानेकुरा सुरक्षित राख्न र तातो हावा चलेका बेला शीतलता लिन त्यहाँ बरफ प्रयोग भइरहेको छ । बरफको मूल्य निरन्तर बढ्दा आर्थिक रूपमा विपन्नहरूले थप सकस भोगिरहेका छन् ।

यतिखेर राजधानी बमाकोमा रातको समयमा तापक्रम ४६ डिग्री सेल्सियसम्म पुग्न थालेको छ । गर्मीका कारण मानिसहरू बेहोस भइरहेका छन् । उनीहरूलाई जगाउन बरफमा चिस्याइएको पानी छम्किने गरिएको छ ।

केही शहरहरूमा एक थैली बरफको मूल्य ३०० देखि ५०० फ्रयाङ्कसम्म पुगेको छ । त्यहाँ पाउरोटीको मूल्य २५० फ्रयाङ्क पर्छ ।

मालीको सरकारी ऊर्जा कम्पनी गएका वर्षदेखि नै करोडौं डलर ऋणमा डुबेका छन् । ती कम्पनीले मागबमोजिम बिजुली आपूर्ति गर्न सकिरहेका छैनन् ।

गर्मीका कारण राजधानीमा मात्रै यो सिजनमा १०० जनाभन्दा बढीको मृत्यु भइसकेको छ ।