काठमाडौं- कोशी प्रदेशका पूर्वआन्तरिक मामिला तथा कानुनमन्त्री लीलाबल्लभ अधिकारी जापान जाँदा भएको मानव तस्करी प्रकरणमा तीनजनालाई थुनामा पठाउने आदेश भएको छ ।
नेकपा एमालेका नेतासमेत अधिकारी गत कात्तिक १३ गते जापान जाने क्रममा भएको मानव तस्करी प्रकरणमा शुक्रबार काठमामडौं जिल्ला अदालतमा न्यायाधीश बलराम लम्सालको इजलासले तीनजनालाई थुनामा पठाउन आदेश दिएको हो ।
अदालतले धादिङको त्रिपुरासुन्दरी गाउँपालिका-६ निवासी महेश पाण्डे, नुवाकोटको बिदुर नगरपालिका-७ निवासी जुगल रिजाल र दोलखाको जिरी नगरपालिका-९ निवासी वीरबहादुर सुनुवारलाई पुर्पक्षका लागि थुनामा पठाउन आदेश दिएको हो ।
अदालतले यो प्रकरणमा मुछिएका अन्य तीनजनालाई धरौटीमा र दुईजनालाई साधारण तारेखमा रिहा गर्न पनि आदेश दिएको छ ।
गतत कात्तिक १३ गते प्रदेश र संघीय सरकारको अनुमतिबिना नै जापान जाने क्रममा मन्त्रालयका नक्कली कागजात र परिचयपत्र बनाएर तीनजना युवकलाई लगेको आरोपमा पक्राउ परेका पूर्वमन्त्री अधिकारीलाई भने जिल्ला सरकारी वकिलको कार्यालयले मुद्दा नचल्ने निर्णय गरिसकेको छ ।
प्रदेश मन्त्रिपरिषद् र संघीय सरकारबाट पनि भ्रमण स्वीकृत नगराई जापान उडेका अधिकारीले तीनजना युवकलाई लगेको प्रकरणमा मन्त्री पद गुमाएका थिए । उनलाई त्यसपछि नेकपा एमालेले सबै जिम्मेवारीबाट निलम्बन गरेको थियो।
सरकारी वकिलको कार्यालय काठमाडौंले पूर्वमन्त्री अधिकारीलाई मुद्दा नचलाउँदा अन्य ११ जनाविरुद्ध भने मुद्दा चलाउने निर्णय गरेको थियो । उक्त घटनामा संलग्न रहेको आरोपमा ११ जनालाई प्रतिवादी बनाउँदै मुद्दा चलाउँदा तीनजना जेल गएका हुन् ।
मानव तस्करी प्रकरणमा अधिकारी गत कात्तिक २५ गते विराटनगरस्थित निवासबाटै पक्राउ गरेका थिए । उक्त प्रकरणमा जापानको अध्यागमन विभागबाट ४ जना डिपोर्ट भएका थिए । जापानको एक कार्यक्रममा जाँदा उनले असम्बन्धित युवालाई लगेपछि यो प्रकरण चर्किएको थियो ।
मन्त्री अधिकारीसँग जापान गएका तीनजनाले आफूहरूले १० देखि १४ लाख रुपैयाँसम्म बुझाएको बयान काठमाडौं प्रहरीसमक्ष दिएका थिए ।
मानव तस्करीमा मुछिएपछि अधिकारीकाे तीव्र विरोध भएको थियो । त्यसपछि उनले मन्त्री पदबाट राजीनामा दिए । उनलाई एमालेले राष्ट्रिय प्रतिनिधि परिषद् सदस्य र संगठित सदस्यबाट पनि निलम्बन गरेपछि प्रहरीले घरैबाट पक्राउ गरेर काठमाडौं ल्याएको थियो ।
जिल्ला सरकारी वकिलको कार्यालयले यस प्रकरणमा मुछिएका दावा शेर्पा, गोपाल भन्ने योगराज गौतम, जनक राई, महेश पाण्डे, वीरबहादुर सुनुवार, गुडी राई, नवीन राई, कञ्चन देवकोटा, विष्णुप्रसाद भट्टराई, जुगल रिजाल र दिवाकरबाबु भट्टराईविरूद्ध मुद्दा दर्ता गरेको थियो। जसमध्ये दिवाकरबाबु, गोपाल र विष्णुप्रसाद फरार छन्।
प्रतिक्रिया