काठमाडौं– नेपाल कम्युनिष्ट पार्टी (एमाले)ले आयोजना गरेको राष्ट्रिय महिला भेलामा अध्यक्ष ओली आइपुगेका छन् । 

बुधबार काठमाडौँस्थित प्रज्ञा भवन कमलादीमा आयोजित सो भेलामा आली पनि सहभागी भएका हुन् ।

भेलामा पार्टीका २३ वटै जनसंगठनका महिला नेता, पार्टीबाट निर्वाचित महिला जनप्रतिनिधि, पार्टीको प्रदेश तथा जिल्ला कमिटीका महिला पदाधिकारी, अनेरास्ववियुको तर्फबाट स्ववियुमा निर्वाचित महिला गरी ५ हजार प्रतिनिधि सहभागी छन् । 

राष्ट्रिय भेलाको प्रमुख अतिथि पूर्वराष्ट्रपति विद्यादेवी भण्डारी र अध्यक्ष ओली रहेका छन् । 

२०६३ साल जेठ १६ गते तत्कालीन पुनर्स्थापित प्रतिनिधि सभाले आमाको नामबाट नागरिकता, राज्यका सबै तहमा एक तिहाइ महिला सहभागिताको सुनिश्चितता, विभेदकारी कानुनको खारेजी र महिला हिंसाको अन्त्य गर्ने विषयलाई संसद्को संकल्प प्रस्तावको रूपमा पास गरेको थियो। त्यसैको सेलिब्रेसन गर्ने भेला आयोजना गरिएको पूर्व मन्त्री विमला राई पौडेलको भनाइ छ ।

उनका अनुसार आज कार्यपत्र पनि प्रस्तुत हुने छ । कार्यपत्र राई र विद्या भट्टराईले बनाएका छन् । उक्त पत्रमा युगदेखि अहिले सम्मको महिला आन्दोलनको उपलब्धि समेटिएको बताइएको छ ।