काठमाडौं- जनता समाजवादी पार्टी नेपालका सांसद राजकिशोर यादवले सरकारले गरेको राजदूत सिफारिसप्रति आपत्ति जनाएका छन् ।

प्रतिनिधिसभाको बुधबारको बैठकको विशेष समयमा बोल्दै यादवले समानुपातीक समावेशितालाई ख्याल नगरि राजदूत सिफारिस गरिएको भन्दै आपत्ति जनाए ।

उनले संविधानमा रहेको व्यवस्थालाई सरकारले मान्नुपर्छ की पर्दैन भन्दै प्रश्नसमेत गरे । पहिलो र दोश्रो दल मिलेर बनेको सरकार अन्तिम विकल्प भए पनि सरकार ट्रंकलाइनमा अल्झिएको उनले बताए ।

यादवले ठूला कुरा गरेर कुनै काम नगर्न नसक्ने अवस्थामा वर्तमान सरकार देखिएको धारणा राखे । अहिलेको सरकारले भ्रष्टाचारका कुनै फाइल खोल्न नसक्दा जनतामा आशा नदेखिएको उनको भनाइ छ ।

उनले भ्रष्टाचार कसुरमा पाँच वर्ष हदम्याद राख्ने प्रस्ताव स्वीकार्य नहुने भन्दै कुनै हदम्याद नचाहिने स्पष्ट पारे । टुँडिखेलमा जनताले नेताहरूप्रति गरेको विरोध प्रारम्भीक संकेत भएकाले सुध्रनुको विकल्प नरहेको पनि उनले बताए ।