काठमाडौं- काठमाडौं महानगरपालिका-१० शंखमूल साईबाबा पार्कस्थित पुल हाउसका सञ्चालक रूपक बान्तवाको हत्या गरेको अभियोगमा एकजना पक्राउ परेका छन् ।
प्रहरीले शंखमूल नै बस्दै आएका बाराको सिम्रौनगढ नगरपालिका-७ निवासी २२ वर्षीय एमके कुमारलाई बुधबार बिहान पक्राउ गरेको हो ।
कुमारले सोमबार बिहान रड प्रहार गर्दा गम्भीर घाइते भएका रूपकको निजामती अस्पतालमा उपचारको क्रममा ज्यान गएको थियो ।
जिल्ला प्रहरी परिसर काठमाडौंको टोलीले कुमारलाई उनकै कोठाबाट पक्राउ गरेको हो ।
जिल्ला प्रहरी परिसर काठमाडौंका एसपी नवराज अधिकारीले बुधबार बिहान सवा १० बजे उनलाई पक्राउ गरिएको बताए । अधिकारीका अनुसार पुरानो रिसइबीका कारण रडले हानेर बान्तावाको हत्या गरेको खुलेको छ ।
प्रहरीले उनलाई पक्राउ गरी प्रहरी वृत्त बानेश्वरमा राखेको छ। घटनामा प्रयोग भएको रड र मृतकको चेक, चस्मा, झोला र लुगा पनि बरामद भइसकेको छ ।
