काठमाडौं- राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले मुलुक जोगाउन अहिले हिँडिरहेको मार्गचित्र परिवर्तन गर्नुपर्नेमा जोड दिएका छन् ।

‘देशले अहिलेको ब्यवस्था र प्रणाली धान्न सक्दैन । यो व्यवस्था भ्रष्टतन्त्रमा रूपान्तरित भइसकेको छ’, नवप्रवेशीहरूका निमित्त शुक्रबार आयोजित अभिमुखीकरण कार्यक्रममा बोल्दै थापाले भने, ‘संघीयता देशले धान्दैन, खारेज गर्नुपर्छ, धर्मनिरपेक्षता हटाउनुपर्छ, हिन्दुराष्ट्र कायम गर्नुपर्छ ।’

देशको स्वाधीनताको रक्षाका लागि राजसंस्था आवश्यक भएको पनि थापाले बताए ।

विदेशी दबाब र प्रभाव बढाउन यो राज्य प्रणालीले काम गरेको भन्दै थापाले आत्मसर्पणवादी मानसिकताले देशको हित नहुने स्पष्ट पारे ।

राप्रपा नेपाल दूरदर्शी रुपमा अघि बढ्ने भन्दै उनले मुलुकको आर्थिक, सामाजिक, राजनीतिक रुपान्तरण गर्न सम्बर्द्धनवादको नीति अबलम्बन गर्ने बताए ।

धर्म, संस्कृति र मूल्य मान्यताको रक्षाको लागि पार्टी बलियो बनाउनुपर्ने भन्दै थापाले संगठन निर्माणमा केन्द्रित हुन आग्रह गरे ।