काठमाडौँ– अमेरिकी निजी अन्तरिक्ष कम्पनी ओडिसियसको ल्यान्डरले चन्द्रमाको दक्षिणी ध्रुवमा सफलतापूर्वक अवतरण गरेको ।

अमेरिकाको ह्युस्टनस्थित निजी कम्पनी इन्ट्युसिभ मसिन्सको ल्यान्डर ओडिसियसले चन्द्रमाको दक्षिणी ध्रुवमा अवतरण गरेको हो ।

योसँगै ओडिसियस चन्द्रमामा अवतरण गर्ने निजी कम्पनीको पहिलो अन्तरिक्षयान बनेको छ ।

इन्ट्युसिभ मसिन्सको ल्यान्डर सफलतापूवर्क अवतरण भएसँगै चन्द्रमाको दक्षिणी ध्रुवमा ल्यान्डर अवतरण गर्ने अमेरिका भारतपछि दोस्रो मुलुक बनेको छ ।

गत अगस्ट २३, २०२३ मा भारतको चन्द्रयान–३ सफलतापूर्वक दक्षिण ध्रुवमा अवतरण भएको थियो ।

चन्द्रमामा रहेको धुलोको परिक्षण गर्ने
ओडिसियस मुन मिशनको उद्देश्य चन्द्रमामा रहेको धुलोको अध्ययन गर्नु हो । खासमा पहिलो अमेरिकी चन्द्र अभियान अपोलो मिसनका अन्तरिक्षयात्रीहरूले चन्द्रमाको धुलोका कारण आफ्नो उपकरण बिग्रिएको बताएका थिए ।

त्यसकारण अब वैज्ञानिकहरूले अन्तरिक्ष यान अवतरण गर्दा उडेको धुलो हावामा कसरी रहन्छ र त्यसपछि चन्द्रमाको सतहमा कसरी बस्छ भन्ने अध्ययन गर्न चाहन्छन् ।

अवतरण भएको ठाउँमा मानिस पठाउने तयारी
बीबीसीका अनुसार ल्यान्डर ओडिसियसले अवतरण गरेको ठाउँलाई मालापर्ट भनिन्छ । त्यस ठाउँमा घामको किरण पुग्दैन ।

यो खाडल नजिकैको समतल ठाउँ हो । त्यस ठाउँमा पानी भएपनि बरफको रुपमा रहेको वैज्ञानिकहरुको विश्वास छ ।

यो क्षेत्र अमेरिकी अन्तरिक्ष एजेन्सी नासाले आर्टेमिस मिशन अन्तर्गत अन्तरिक्ष यात्रीहरू पठाउने विचार गरिरहेका ठाउँहरूको सर्टलिस्टमा छ ।
स्रोत : अन्तर्राष्ट्रिय मिडियाको सहयोगमा