काठमाडौं – उत्तरार्धमा मनसुन सक्रिय हुँदा यतिखेर काठमाडौं उपत्यका लगायत देशभर झरी परिरहेको छ । बिहीबार साँझदेखि परेको झरीले सडक र हवाई यातायात प्रभावित छ ।

लगातार पानी पर्दा विमान उडान र अवतरणमा समस्या पर्ने गर्छ । यही समस्या यतिखेर नेपाल गन्तव्य बनाएका दुई विमानले भोगिरहेका छन्‌ । झरीका कारण त्रिभुवन अन्तरराष्ट्रिय विमानस्थलमा अवतरण गर्न नसकेपछि ती जहाजले आकाशमै चक्कर लगाइरहेका छन्‌ ।

फ्लाइटराडारट्वान्टीफोरडटकम का अनुसार भारतको राजधानी नयाँ दिल्लीबाट बिहान ११ः३३ मा काठमाडौंका लागि उडान भरेको इन्डिगो एअरलाइन्सको जहाज पूर्वनिर्धारित समयअनुसार दिउँसो १ः०५ मा अवतरण भइसक्नुपर्ने हो ।

तर, काठमाडौंमा लगातार वर्षा र कम भिजिबिलिटी भएपछि यो विमानले भारत र नेपालको सीमा वरपर झण्डै दर्जन फन्को लगायो । सो विमान पनि त्रिभुवन अन्तरराष्ट्रिय विमानस्थलमा भर्खरै अवतरण भएको छ ।

काठमाडौंबाट भारतको मुम्बई उडान भर्न खोजेको नेपाल एअरलाइन्सको विमान पनि त्रिभुवन विमानस्थलमै रोकियो । दिउँसो २ बजे उड्नुपर्ने विमान झरीका कारण रोकिएर २ः३० मा बल्लतल्ल उडेको छ । तर, काठमाडौंलाई नै फन्को लगाउन थालेको छ ।

थाइ एअरवेजको टीजी३१९ कलसाइनको विमानले पनि आज नेपाल र भारतको सीमावर्ती क्षेत्रमा निकै चक्कर लगायो । बैंककबाट १०ः२८ मा उडेको सो विमान पूर्वनिर्धारित तालिकाअनुसार मध्याह्न १२ः२५ मा त्रिभुवन अन्तरराष्ट्रिय विमानस्थलमा अवतरण भइसक्नुपर्ने थियो ।

तर, नेपालमा परेको अविरल झरीले यो विमानलाई पनि रन-वेमा आउन दिएन । आकाशमा फन्कै फन्का लगाएर झण्डै दुई घण्टा ढिला गरी दिउँसो २ः१८ मा मात्र अवतरण भयो ।