काठमाडौं – पाकिस्तानमा भएको साम्प्रदायिक हिंसामा परी ४३ जनाको मृत्यु भएको छ । पाकिस्तानको खैबर पख्तुनख्वा प्रान्तको कुर्रम जिल्लामा साम्प्रदायिक हिंसा फैलिएको हो ।

शिया मुसलमानको समूहमा बन्दुकधारीले गोली प्रहार गरेपछि हिंसा फैलिएको हो । हिंसाको पाकिस्तानी अधिकारी र मानव अधिकार समूहले निन्दा गरेका छन् ।

पाकिस्तानको स्वतन्त्र मानव अधिकार आयोग (एचआरसीपी)ले विज्ञप्ति जारी गर्दै यस घटनाले नागरिकको सुरक्षा गर्न सरकार असफल भएको पुष्टि भएको टिप्पणी गरेको छ ।

पीडितमध्ये सात जना महिला र तीन जना बालबालिकासमेत रहेका छन् । हिंसामा परी अरु १६ जना घाइते भएका छन् ।

लामो समयदेखि यस क्षेत्रमा सुन्नी र शिया मुस्लिम जनजातिहरूबीच झडप हुने गरेको छ । साम्प्रदायिक हिंसा फैलिएपछि सो क्षेत्रमा कर्फ्यु घोषणा गरिएको छ भने मोबाइल सेवासमेत बन्द गरिएको छ ।