काठमाडौं– नेकपा (एमाले)का सांसद्‌ रघुजी पन्तले प्रधानमन्त्री पुष्पकमल दाहाल ‘प्रचण्ड’लाई सरकारको काम गराइबाट स्वयम्‌ सन्तुष्ट भए/नभएबारे प्रश्न सोधेका छन्‌ ।

प्रतिनिधि सभामा जारी ‘प्रधानमन्त्रीसँग प्रत्यक्ष प्रश्नोत्तर कार्यक्रम’मा सांसद्‌ पन्तले गरिरहेको कामबाट सांसद्‌ र जनता सन्तुष्ट हुन नसकेको बताए ।

‘प्रधानमन्त्रीले सरकारबाट काम गरिरहेको छु भन्नुहुन्छ । हामी सांसद्‌ र जनताचाहिँ सन्तुष्ट हुन सकेका छैनौं,’ पन्तले भने, ‘प्रधानमन्त्रीज्यू कति सन्तुष्ट हुनुहुन्छ ?’

उपराष्ट्रपति नै राष्ट्रिय सभा अध्यक्ष !
सांसद्‌ पन्तले बढिरहेको चालु खर्च घटाउन उपराष्ट्रपति र राष्ट्रिय सभाका अध्यक्ष एउटै हुने व्यवस्थामा जान सकिनेबारे प्रधानमन्त्रीको धारणा माग गरेका छन्‌ ।

‘राष्ट्रपतिले ४/५ जना सल्लाहकार राख्ने प्रथा घटाउनेगरी कानून ल्याउने विषयमा उहाँको विचार के छ ?  निर्वाचन प्रणालीले पनि अस्थिरता बढाएको भनी प्रश्न उठिरहेको छ, यसबारे उहाँको विचार के छ ?’ पन्तले थप प्रश्न सोधे, ‘सोह्रौं योजना हेर्दा यो योजना कार्यान्वयनलाई बल पुर्‍याउनेगरी विभिन्न मन्त्रालयको शीर्षकमा बजेट विनियोजन भएको उचित देखिएन, यसबारे प्रधानमन्त्रीज्यूको धारणा के छ? जान्न चाहन्छु ।’