काठमाडौं– औपचारिक माध्यमबाट सुनको आयातमा ठूलो गिरावट देखिएको छ । भन्सार विभागको विभागको पछिल्लो तथ्यांकअनुसार अघिल्लो आर्थिक वर्ष ०८०/८१ को पहिलो चौमासिक अवधिको तुलनामा चालु आर्थिक वर्षको पहिलो चौमासिक अवधिमा सुनको आयातमा ८६.७५ प्रतिशत बढीले गिरावट देखिएको हो ।

चालु आर्थिक वर्षको तीन महिनामा नेपालमा १ अर्ब ४२ करोड ७५ लाख २८ हजार रुपैयाँ बराबरको १ लाख ३२ हजार ५६४ ग्राम सुन आयात भएको छ । जसबाट सरकारले २८ करोड ५५ लाख ७ हजार रुपैयाँ भन्सार राजस्व आम्दानी गरेको छ ।

साथै सोही अवधिमा प्लेटिनम सहितको सुन १ अर्ब ६ करोड २९ लाख ४२ हजार र विभिन्न सुनका सामग्री १९ करोड ८ लाख १ हजार बराबरको आयात भएको छ ।

तर, अघिल्लो आर्थिक वर्षको पहिलो चौमासिक अवधिमा नेपालमा ८ अर्ब २० करोड ८१ लाख ७० हजार रुपैयाँ बराबरको १० लाख ५ सय ग्राम सुन औपचारिक माध्यमबाट आयात भएको थियो । सो आयात प्रक्रियामा सरकारले १ अर्ब २३ करोड १२ लाख ३७ हजार राजस्व संकलन गरेको थियो ।

अघिल्लो आर्थिक वर्ष ०८०/८१ को सोही अवधिमा नेपालमा औपचारिक माध्यमबाट ६९ करोड ९२ लाख २५ हजार रुपैयाँ बराबरको प्लेटिनम सहितको सुन र ११ करोड ३२ लाख ४५ हजार रुपैयाँ बराबरको सुनका विभिन्न सामग्री आयात भएको विभागको तथ्यांकमा उल्लेख छ ।

सरकारले चालु आर्थिक वर्षको बजेटमार्फत सुनमा लगाउँदै आएको भन्सार राजस्व १५ प्रतिशतबाट बढाएर २० प्रतिशत र भारतले घटाएर ६ प्रतिशतमा झारेपछि नेपालमा औपचारिक माध्यमबाट आयात हुने सुनको मात्रा घट्न पुगेको देखिन्छ । व्यवसायीहरूले पनि अहिले नेपालको सुन बजार भन्सार छलीको सुनले भरिएको बताउने गरेका छन् ।