काठमाडौं– राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्रले नेपालको संविधान २०७२ लाई नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ को संविधान भएको टिप्पणी गरेका छन् ।

संविधान निगरानी समूह र इन्स्टिच्युट फर स्ट्राटेजिक एन्ड सोसियो–इकोनोमिक रिसर्च (आईएसएसआर)को संयुक्त आयोजनामा सोमबार आयोजित ‘संविधान कार्यान्वयन : अपेक्षा र वास्तविकता’ विषयक अन्तक्रिया कार्यक्रम यस्तो टिप्पणी गरेका हुन् ।

‘नेपालको संविधान २०७२ लाई मैले प्रचण्डको संविधान २०७२ भन्ने गरेको छु । यो संविधानलाई प्रचण्डको संविधान भन्नुको कारण के हो भने यसबाट जे भएको छ, त्यो प्रचण्डकै संविधानमार्फत् गरिएको छ,’ मिश्रले भने, ‘अब प्रचण्डको संविधानलाई नेपालको संविधान बनाउनु पर्छ भन्ने मेरो धारणा हो ।’

राप्रपाका वरिष्ठ उपाध्यक्ष मिश्रले नेपाली कांग्रेस र नेकपा एमालेका नेताहरूले संविधान आफूहरूले बनाएको भनेर हात उठाए पनि संविधान निर्माणमा सबै सहायक भूमिकामा र केन्द्रमा प्रचण्ड नै रहेको बताए ।

सशस्त्र द्वन्द्वको १० र मूलधारको राजनीतिमा आएको १५ वर्ष नेपालको राजनीति माओवादी अध्यक्ष प्रचण्डकै वरिपरि घुमिराखेको बताए ।

‘पहिले सशस्त्र द्वन्द्वको १० वर्ष त्यो सम्पूर्ण समय प्रचण्डको वरिपरि राजनीति घुम्यो । र, जब उहाँ मूलधारको राजनीतिमा आउनुभयो १५ वर्षपछि पनि उहाँकै वरिपरि राजनीति घुमिराखेको छ,’ उनले भने, ‘३२ सीटको जादुमय कुरा त उहाँ आफैंले गर्नुभएको छ । सीट थोरै होस् वा धेरै उहाँकै वरिपरि घुमिरहेको छ ।’

संविधानको अब हाँगा र पातको उपचार खोजेर यसलाई टालटुल गरेर देशलाई सही दिशामा ल्याउन नसकिने मिश्रको भनाइ थियो ।

‘तपाईंको कोटमा एक, दुई ठाउँमा प्वाल पर्‍यो भने सिलाउन सकिन्छ । तर, जताततैबाट च्यातियो भने सकिदैँन्,’ उनले भने, ‘त्यसैगरि यो संविधानको अब हाँगा–हाँगा र पातको उपचार खोजेर, यो संविधानले यो देशलाई सही दिशामा ल्याउन सकिदैँन् । यो संविधानलाई टालटुल गरेर हुँदैन ।’