विराटनगर– कोशी प्रदेशका निवर्तमान मुख्यमन्त्री केदार कार्कीले त्यहाँस्थित सामाजिक विकास मन्त्रालयका सचिव लक्ष्मीप्रसाद भट्टराईलाई कुटपिट गरी शौचालय थुन्ने धम्की दिएका छन् ।

कार्कीले सोमबार अपरान्ह आफूलाई फोन गरेर कुटपिट गरी शौचालयमा थुन्ने धम्की दिएको सचिव भट्टराईले विज्ञप्ति निकालेरै जनाएका छन् ।

कुटपिटको धम्की आएपछि सचिव भट्टराईले जिल्ला प्रशासन कार्यालय मोरङ र मुख्यमन्त्री तथा मन्त्रिपरिषद्को कार्यालयमा सुरक्षाको मागसहित निवेदन दिएका छन् ।

पूर्वमुख्यमन्त्री कार्कीले विराट गोल्डकपका लागि आफूद्वारा घोषित २५ लाख रुपैयाँ मन्त्रालयले भुक्तानी नगरे भन्दै रिसाएका थिए । त्यही रिसमा उनले भट्टराई कुटपिटको धम्की दिएको बताइएको छ ।

‘कुटपिट गरेर शौचालयमा लगेर थुन्ने धम्की आयो, त्यसपछि मैले सुरक्षा माग गरेँ, मलाई सोमबार अपरान्ह ४:५३ मा फोन आएको थियो, जिल्ला प्रशासन र मुख्यमन्त्री कार्यालयमा निवेदन दिएको छु’ सचिव भट्टराईले भनेका छन्, ‘पुरानो फाइललाई भुक्तानी दिन अर्थले सहमति दिएन । त्यसको रिस उहाँले मलाई पोख्नु भएको होला । अर्थ मन्त्रालयमा रोकिने कुरा हामीबाट सम्भव हुँदैन ।’

विराट गोल्डकपको रकम भुक्तानीको माग आएपछि अर्थ मन्त्रालयमा पैसा मागिएको बताए । तर अर्थले पुरानो भुक्तानी दिन सहमति नदिएको उनको दाबी छ ।

पूर्वमुख्यमन्त्री कार्कीले भौतिक आक्रमण गर्ने धम्की दिएको भन्दै उजुरी आएको जिल्ला प्रशासन कार्यालय मोरङले जनाएको छ । प्रशासनले पनि कार्कीलाई सोधेको थियो । उनले पनि कुट्ने धम्की दिएको स्वीकारेको प्रशासन स्रोतको भनाइ छ ।

विराट गोल्ड कप ट्रष्टका पदाधिकारीले प्रतियोगिता भइट्ठके पनि रकम नआएको भन्दै पूर्व मुख्यमन्त्री कार्कीलाई गुनासो गरेका थिए । त्यसपछि कवि भैरोदान सुरानालाई श्रद्धाञ्जली दिन पुगेका कार्कीले सचिव भट्टराईलाई फोन गरेर भुक्तानी विवादमा कुटपिट गरी शौचालयमा थुन्ने धम्की दिएका थिए ।

कार्कीले मुख्यमन्त्री हुँदा आफैंले आर्थिक मामिला तथा योजना मन्त्रालय लिएका थिए । आफू मन्त्री हुँदा भुक्तानी नगराएका उनले बाहिरिएपछि सचिवसँग विवाद गरेका हुन् ।