काठमाडौं- प्रमुख प्रतिपक्षी नेपाली कांग्रेसमा महामन्त्री विश्वप्रकाश शर्माले सहकारीको बचत हिनामिना प्रकरणमा उपप्रधान तथा गृहमन्त्री रवि लामिछानेले घुमाउरो रूपमा स्वीकारोक्ति गरिसकेको बताएका छन् ।

बिहीबार काठमाडौंमा नेविसंघ झापा–काठमाडौं सम्पर्क मञ्चको कार्यक्रममा शर्माले संसद्‍मा अरुमाथि आरोप लगाएर गृहमन्त्रीले आफूमाथिको आरोपको पनि घुमाउरो भाषामा स्वीकारोक्ति प्रकट गरेको बताए ।

कांग्रेसको सांसद, सभापति, दाजुभाउजू, मामामाइजू, नातागोता, महामन्त्री, सहमहामन्त्री र सबै नेतामाथि नामै लेखेर छानबिन गर्न उनले चुनौती पनि दिए ।

उनले आफूहरूको छानबिनका लागि जात, गोत्र र तीन पुस्ते सबै लेख्दा पनि फरक नपर्ने बताए । यदि आफूले भ्रष्टाचार गरेको ठहरिए आफैं जेल जाने बताउँदै उनले कोही पनि सती जानुनपर्ने बताएका छन् ।

शर्माले जोमाथि छानबिन भएर दोषी देखिन्छ, उही जेल जाने भएकाले अरुलाई मुछ्न नहुने धारणा राखे ।

लामिछानेलाई कांग्रेसले दोषी नभनेको स्पष्ट पार्दै उनले छानबिन समितिले निकाल्ने निष्कर्षलाई स्वीकार गर्न सक्नुपर्ने बताए ।

शर्माले संसदीय छानबिन समिति गठनमा सत्तापक्षले सबैलाई एकमुष्ट छानबिन गर्नुपर्छ भन्दा सहमति हुन नसकेको जानकारी दिए। उ

उनले विदेशीलाई सूचना बेच्ने भनेर गृहमन्त्रीले कांग्रेस नेताहरूलाई आरोप लगाउँदै दिएको अभिव्यक्तलाई संसद्‍को रेकर्डबाट हटाउनुपर्ने बताए ।