काठमाडौं– नेपाली कांग्रेस गण्डकी प्रदेशले प्रदेश सरकारका कामकारबाही प्रति आपत्ति प्रकट गरेको छ ।

दलका प्रमुख सचेतक नन्दप्रसाद न्यौपानेले आज एक विज्ञप्ति जारी गरी प्रदेश सरकारविरुद्धको मुद्दा सर्वोच्च अदालतमा विचाराधिन रहेको अवस्थामा प्रदेशसभाको अधिवेशन आह्वान गरिएकोमा आपत्ति जनाएका हुन् ।

मुख्यमन्त्री खगराज अधिकारीले लिएको विश्वासको मत विरुद्ध सर्वोच्चमा दायर रिटमा सर्वोच्चले प्रदेश सरकारलाई दीर्घकालिन असर पर्ने गरी कुनै निर्णय नगर्नु, नगराउनु भन्ने अन्तरिम आदेश जारी भएको अवस्थामा शुक्रबार (जेठ ११ गते) प्रदेशसभा आह्वान गर्नु अदालतको अवहेलना हुने कांग्रेसको ठहर छ ।

प्रदेश सरकारले आगामी बजेटका सन्दर्भमा पूर्व छलफल गराउने उद्देश्यले  शुक्रबार दिउँसो ३ बजे प्रदेशसभा बैठक आह्वान गरेको छ ।

उक्त मुद्दामा निरन्तर सुनुवाइ भइरहेकाले मुद्दाको टुंगो नलागेसम्म प्रदेश सभा बैठक र सरकारले गर्ने कुनैपनि कार्यमा नेपाली कांग्रेसको सहभागीता नरहने जनाएको छ ।

अदालतको आदेश विपरितका कार्य भएमा कांग्रेस संसदीय दललाई मान्य नहुने र त्यसबाट उत्पन्न परिस्थितिको स्वयं सरकार र आदेश उलंघन गर्ने पक्ष नै जिम्मेवार हुने कांग्रेसले चेतावनी दिएको छ ।

गत वैशाख २३ गते गण्डकी प्रदेशका मुख्यमन्त्री अधिकारीले विश्वासको मत लिने क्रममा सभामुखले ६० सदस्यीय प्रदेशसभामा ३० जनाको समर्थनलाई नै बहुमत प्राप्त गरेको भनि घोषणा गरेको प्रक्रिया विरुद्ध कांग्रेसले सर्वोच्चमा रिट दायर गरेको थियो ।