मंगलबार अपरान्ह नेपालमा अवतरण गर्न लागेका कतारका अमिर शेख तमिम बिन हमाद अल थानीलाई ह्युम्यान राइट्स वाचले आप्रवासी कामदारको अवस्था र उनीहरूको अधिकारबारे सचेत गराएको छ ।

कतारी अमिरलाई नेपालमा भव्य स्वागतको तयारी भइरहँदा अमेरिकामा मुख्यालय रहेको उक्त विश्वचर्चित संस्थाले आप्रवासी कामदारको सुरक्षा र उनीहरूको अधिकारबारे सचेत गराएको हो ।

बंगलादेशको भ्रमण सकेर कतारी अमिर ढाकाबाट काठमाडौं अवतरण गर्दैछन् । उनलाई राष्ट्रपति रामचन्द्र पौडेल त्रिभुवन विमानस्थलमै पुगेर स्वागत गर्ने तयारी छ ।

यस्तोमा नेपाल र बंगलादेशका कामदारहरूको अवस्थामा र उनीहरूको सुरक्षामा ध्यान दिन ह्युम्यान राइट्स वाचले भनेको हो । उक्त संस्थाले कतारको श्रमबजारमा नेपाल र बंगलादेशबाट मात्रै ८८ प्रतिशत कामदार कार्यरत रहेको पनि स्मरण गराएको छ । कम्तीमा यो भ्रमणका क्रममा दुवै देशका आप्रवासी मजदुरहरूको हितका लागि काम गर्न अमेरिकी संस्थाले कतारी अमिरलाई भनेको छ ।

ह्युम्यान राइट्स वाचका मध्यपूर्व तथा उत्तर अफ्रिकी क्षेत्रीय उपनिर्देशक माइकल पेजले नेपाल र बंगलादेशको भ्रमण कूटनीतिक शिष्टाचार आदानप्रदानमा मात्रै सीमित हुन नहुने अडान राखेका छन् । उनले दुवै देशबाट कतारमा रहेका लाखौँ मजदुरको पक्षमा कतारले प्रभावकारी कदमसहित सुरक्षा र अधिकारको रक्षा गर्न अमिरलाई भनेका छन् ।

‘कतारका राजाले दुवै देशकका राष्ट्र प्रमुखको भेटलाई कूटनीतिक शिष्टाचारमा मात्रै सीमित नगरेर मजदुरहरूको हितमा प्रभावकारी कदम चाल्नु आवश्यक छ । कतारमा श्रम गरेर फर्किएका आप्रवासी कामदारहरूले भरिएका डाइलाइसिस केन्द्रसम्म पुग्दै कतारमा श्रमका क्रममा ज्यान गुमाएकाहरूका परिवारलाई भेट्दै त्यहाँ जोखिमयुक्त काम गर्न विवश भएकाको अवस्थाबारे मनन गर्न सक्नु पर्छ ।’

बंगलादेश र नेपालका आप्रवासी कामदारहरूकै योगदनका कारण कतारले सन् २०२२ को विश्वकप गर्न सफल भएको हो । उक्त विश्वकपका लागि रंगशालासहितका पूर्वाधार बनाउने क्रममा दुवै देशका सयौँ कामदारले ज्यान गुमाएका थिए । त्यहीकारण कतारले विश्वजगतबाट चर्को आलोचना खेप्नु् परेको थियो ।

कतारको उचाइ लिँदो अर्थतन्त्रका लागि यी दुई देशका कामदार अपरिहार्य जस्तै छन् । ह्युम्यान राइट्स वाचले कतारी अमिर भ्रमणमा निस्किएको कतार–नेपाल र बंगलादेशको रुटमा दैनिक हजारौँ कामदारले अहिले पनि यात्रा गर्ने स्मरण गराएको छ ।

कतारले विदेशीहरूलाई नागरिकता दिँदैन । आप्रवासी कामदारहरू कतारमा केही वर्ष श्रम र पसिना बगाएर स्वदेश फर्किन्छन् । आर्थिक अवस्था कमजोर भएका दुवै देशका कामदारहरू कतार पुगेर जोखिमयुक्त काम गर्दै केही लाख पैसा कमाएर फर्किने गरेका छन् ।