काठमाडौं – चालु आर्थिक वर्षको तीन महिनामा नेपालको वैदेशिक व्यापार घट्न पुगेको छ । भन्सार विभागले बुधबार सार्वजनिक गरेको तथ्यांकअनुसार चालु आर्थिक वर्षको तीन महिनामा नेपालको वैदेशिक व्यापारमा गत आर्थिक वर्षको सोही अवधिको तुलनामा ३.९६ प्रतिशतले संकुचन आएको हो ।

विभागकाअनुसार समीक्षा अवधिमा गत आर्थिक वर्षको सोही अवधिको तुलनामा ४.१७ प्रतिशतले आयातमा कमी आएको छ भने ६.११ प्रतिशतले निर्यातमा कमी आएको छ । समीक्षा अवधिमा नेपालमा तीन खर्ब ९० अर्ब ७५ करोड २३ लाख २१ हजार बराबरको विभिन्न वस्तु आयात भएको छ भने ३८ अर्ब ३७ करोड ८७ लाख १७ हजार रुपैयाँ बराबरको विभिन्न वस्तु निर्यात भएको छ ।

तथ्यांकअनुसार समीक्षा अवधिमा नेपालमा सबैभन्दा धेरै डिजेल २२ अर्ब १५ करोड ७० लाख ४३ हजार रूपैयाँ बराबरको, पेट्रोल १६ अर्ब ६२ करोड ८२ लाख ३९ हजार रूपैयाँ बराबरको र खाना पकाउने एलपी ग्यास १४ अर्ब ६ करोड ४४ लाख ५३ हजार रूपैयाँ बराबरको आयात भएको छ ।

नेपालमा ३ महिनाको अवधिमा ९ अर्ब ८३ करोड २८ लाख ९८ हजार रूपैयाँ बराबरको मोबाइल भित्रिएको छ भने ७ अर्ब ९३ करोड १३ लाख ६६ हजार रूपैयाँ बराबरको युरिया मल भित्रिएको विभागको तथ्यांकले देखाएको छ ।

तथ्यांकअनुसार चालु आर्थिक वर्षको तीन महिनामा नेपालमा सबैभन्दा धेरै सामग्री भारतबाट २ खर्ब ४० अर्ब ९२ करोड बराबरको आयात भएको छ भने चीनबाट ७८ अर्ब ६३ करोड ७२ लाख ६५ हजार रूपैयाँ बराबरको आयात भएको छ । सोही अवधिमा नेपालले लामो समयदेखि रसियासँग युद्धमा फसेको मुलुकसँग तेस्रो स्तरको आयात गरेको विभागको तथ्यांकले देखाएको छ ।

विभागकाअनुसार समीक्षा अवधिमा नेपालमा युक्रेनमार्फत ६ अर्ब ५१ करोड ५८ लाख १६ हजार रूपैयाँ बराबरको विभिन्न वस्तु आयात भएको छ । त्यसपछि नेपालले सबैभन्दा धेरै सामग्री आयात गर्ने मुलुकहरूमा चौथो अष्ट्रेलिया, पाँचौँ अर्जेन्टिना र छैटौँ अमेरिका रहेका छन् ।