काठमाडौं– राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध जिल्ला सरकारी वकिलको कार्यालयले अभियोग पत्र दर्ता गराएपछि रास्वपा नेताहरू पोखरा पुगेका छन् । उनीहरु रविको निमन्त्रणामा पोखरा पुगेका हुन् ।

पार्टी उपसभापति डिपी अर्याल, नेता शिशिर खनाल, विराजभक्त श्रेष्ठ लगायतका नेता पोखरा पुगेका हुन् । उपसभापति स्वर्णिम वाग्लेले भने शनिबार नै रविलाई भेटेर आज विरगञ्ज पुगेका छन् । केही नेताहरु आइतबार बिहान नै पोखरा पुगेका थिए ।

‘सभापति ज्यूले केही नेतासँग गफ गर्छु भनेर बोलाउनुभएको हो’ रास्वपा स्रोतले भन्यो, ‘उहाँलाई भेट्न पोखरा केही नेता जानुभएको छ ।’

जिल्ला सरकारी वकिलको कार्यालयले ४२७ पृष्ठ लामो अभियोग पत्र जिल्ला अदालतमा दर्ता गराएपछि नेताहरू भावी कार्ययोजना बनाउन छलफल गरिरहेका छन् । ‘अहिलेसम्म कार्यवाहक सभापति पनि तोकिएको छैन । उहाँको मुद्दा दर्ता भएपछि यसबारे निर्णय पनि गर्नुपर्ने छ’ रास्वपा नेताले खबरहबलाई भने, ‘सभापति ज्यूले केही नेता भेट्ने योजना बनाउनुभएको छ । भावी योजना र रणनीतिको विषयमा छलफल गर्नुहुनेछ ।’ ती नेताका अनुसार पहिला कार्यवाहक सभापति बन्न रविले नै रोकेका थिए ।

रविसहित उनकी पत्नी निकिता पौडेल विरुद्ध पनि मुद्दा दायर भएको छ । सहकारी संस्थाको बचत रकम ठगीसम्बन्धी आरोपमा गत कात्तिक २ गते काठमाडौंको वनस्थलीबाट पक्राउ परेका पूर्वगृहमन्त्रीसमेत रहेका लामिछानेसहितका व्यक्ति र कम्पनीविरुद्ध मुद्दा दर्ता गरेको हो ।उक्त मुद्दामा ३६ जना व्यक्ति र ८ वटा कम्पनीविरुद्ध सरकारी वकिलले मुद्दा गरेको हो ।