काठमाडौं – राष्ट्रिय स्वतन्त्र पार्टी (रास्वपा)ले राजनीतिक पूर्वाग्रहबाट प्रेरित भएर पार्टी सभापति रवि लामिछानेको सांसद पद निलम्बनका लागि पत्र पठाइएको बताएको छ ।

लामिछानेको सांसद पद निलम्बनका लागि सङ्घीय संसद् सचिवालय पत्र पुगेपछि रास्वपा नेता दीपक बोहराले सामाजिक सञ्जालमार्फत कानुनको गलत व्याख्या गर्दै रविलाई सांसदबाट निलम्बन गर्न लागिएको बताएका छन् ।

उनले सामाजिक सञ्जालमा लेखेका छन्, ‘रानीतिक पूर्वाग्रहबाट प्रेरित भएर सांसद निलम्बन गर्न खोजिएको स्पष्ट देखियो ।’ उनले सम्पत्ति शुद्धीकरण ऐन, २०६४ र प्रतिनिधिसभा सञ्चालन नियमावली, २०७९ को गलत व्याख्या गरिएको पनि दाबी गरेका छन् । उनले सम्पत्ति शुद्धीकरण ऐन, २०६४ को दफा २७ ले पद निलम्बन हुनेमा जनप्रतिनिधि नभइ राष्ट्रसेवक भनेको बोहराले उल्लेख गरेका छन् ।

यस्तै प्रतिनिधिसभा सञ्चालन नियमावली, २०७९ को दफा २४८ (३) अनुसार सांसद पद निलम्बन हुन पुर्पक्षका लागि थुनामा बस्नैपर्ने उनको दाबी छ । अहिले रवि लामिछाने न्यायिक हिरासतमा मात्र रहेको भन्दै रविलाई सांसदबाट निलम्बन गर्न नमिल्ने उनको तर्क छ ।

बोहराले सामाजिक सञ्जालमा लेखेका छन् ।‘विगतमा नेपालका विभिन्न मुद्दाहरूमा न्यायालयले राष्ट्रसेवकको परिभाषा कार्यकारी शाखासम्म सीमित रहने भनेर व्याख्या गरेको छ । सांसदहरूको जिम्मेवारी विधायिकासम्बन्धी हुने भएकाले उनीहरू कार्यकारी भूमिकामा रहेजस्तो व्यवहार गर्न वा राष्ट्रसेवक मान्न सकिँदैन । अहिले रवि लामिछाने न्यायिक हिरासतमा मात्र छन् । पुर्पक्ष थुनामा नभएकोले निलम्बन गर्न मिल्दैन ।’

याे पनि…

रविलाई निलम्बनको पत्र संसद्‍मा

यस्ताे छ बाेहराकाे फेसबुक स्टाटस