काठमाडौँ– पाकिस्तानको बलुचिस्तानमा हैजाको प्रकोप देखिएको छ । बलोचिस्तानको दिर क्षेत्रमा हैजाको प्रकोप फैलिएको हो ।

पाकिस्तानी अखबार ट्रिब्युनका अनुसार दिर जिल्ला अस्पतालमा दैनिक २ सय जनाभन्दा धेरै हैजाका बिरामी आउने गरेका छन् । 

त्यसबाहेक अस्पतालमा झाडापखाला र ग्यास्ट्रिकका बिरामीको सङ्ख्या पनि धेरै रहेको ट्रिब्युनले जनाएको छ । केही समयअघि सो क्षेत्रमा उच्च तापक्रम र उष्णताका कारण झाडापखाला र ग्यास्ट्रिकका बिरामीको सङ्ख्या बढेको थियो ।

अस्पतालमा सीमित स्रोत साधन रहेकाले बिरामीको उपचारमा समस्या भइरहेको ट्रिब्युनले जनाएको छ । अस्पतालमा आवश्यक औषधि तथा स्वास्थ्य सामग्री पठाउन सो क्षेत्रका स्थानीय राजनीतिक दलका प्रतिनिधि तथा सामाजिक अगुवाले प्रान्तीय सरकारसँग माग गरेका छन् ।