ताइपेई- ताइवानले चीनलाई आफ्नो मुलुकमा सम्पन्न निर्वाचनको नतिजालाई सम्मान गर्न आग्रह गरेको छ । हालै सम्पन्न निर्वाचनमा सार्वभौमिकताका पक्षधर उम्मेदवार लाई चिङ त विजयी भएसँगै ताइवानले चीनलाई मतदाताको चाहनालाई सम्मान गर्न आग्रह गरेको हो ।

ताइवानको विदेश मन्त्रालयले यथार्थलाई स्वीकार गर्दै ताइवानलाई धम्की र चुनौती दिने कामलाई तत्काल रोक्न पनि आह्वान गरेको छ ।

ताइवानमा भएको निर्वाचनमा कुओमिङतान पार्टीका उम्मेदवार होउ यु इहलाई ९ लाख मतान्तरले पराजित गर्दै निवर्तमान उपराष्ट्रपति लाई राष्ट्रपतिमा निर्वाचित भएका थिए । सत्तारुढ डेमोक्र्याटिक प्रोग्रेसिभ पार्टीका उम्मेदवार लाईलाई चीनले ‘खतरनाक पृथकतावादी’ को संज्ञा दिएको थियो ।

चीनले स्वतन्त्र शासन चलाइरहेको ताइवानलाई आफ्नै मुलुकको एक हिस्सा मान्दै आवश्यक परे बल प्रयोग गरेर आफ्नो मातहतमा ल्याउने धम्की दिँदै आएको छ ।