काठमाडौं– नेपाल उद्योग वाणिज्य महासंघ (एफएनसीसीआइ) का अध्यक्ष चन्द्रप्रसाद ढकालले हाल दुई ठूला दल मिलेर राजनीतिक र नीतिगत स्थीरताको प्रतिवद्धता जनाएकाले तीव्र आर्थिक विस्तार सम्भव रहेको बताएका छन् ।

‘स्टार्टअप नेसन २०३०’ लाई सम्बोधन गर्दै ढकालले पछिल्लो राजनीतिक समीकरण र आर्थिक वृद्धिबारे उल्लेख गरेका हुन् । सरकार, महासंघ र सरोकारवाला निकायको आयोजनामा तेस्रो स्टार्टअप नेसन २०३० आयोजना गरिएको हो ।

महासंघ अध्यक्ष ढकालले बजेटमा स्टार्टअपका कार्यक्रम राख्न थालिएको करिब एक दशकपछि स्टार्ट स्टार्टअपलाई परिभाषित गरिएको पनि उल्लेख गरे । गत वैशाखमा लगानी सम्मेलन क्रममा संशोधन भएका आठ कानूनमध्ये एक औद्यागिक व्यवसाय ऐनमा स्टार्टअपको परिभाषा समावेश उनले जनाए ।

महासंघले मस्यौदा तयार गरी सरकारलाई बुझाएको स्टार्टअप नीति पारित भएको पनि ढकालले बताए । ऐन र नियमावलीमै समावेश भएकाले सरकारले स्टार्टअपलाई सहायता प्रदान गर्न सहज भएको पनि उनले दाबी गरे ।

‘उत्साही भएर सरकारले स्टार्टअप अनुदान प्रदान गर्न यसपटकको बजेटमा एक अर्ब २५ करोड रुपैयाँ छुट्याएको छ । अब यसको प्रभावकारी कार्यान्वयन हुने र आवश्यक भएका युवाहरूसम्म यो रकम पुग्ने मैले विश्वास लिएको छु,’ ढकालले भने ।

स्टार्टअप विकास गर्न युवाहरुलाई सहायता प्रदान गर्ने इन्कुवेसन वा इनोभेसन केन्द्रहरु स्थापना गर्न आवश्यक रहेको जनाउँदै ढकालले शुरुवातका रुपमा महासंघले सुदूरपश्चिम प्रदेश सरकार र कैलाली उद्योग वाणिज्य संघको सहकार्यमा इन्कुवेसन केन्द्र स्थापना गर्ने प्रक्रिया शुरू गरेको जानकारी दिए ।