काठमाडौं- नेपाली कांग्रेसले आफ्ना सांसदहरूलाई बजेट निर्णयार्थ प्रस्तुत नहुँदासम्म संसद् बैठकमा अनिवार्य उपस्थित हुन निर्देशन दिएको छ ।

कांग्रेस संसदीय दलका प्रमुख सचेतक रमेश लेखकले आगामी आर्थिक वर्ष २०८१/८२ को विनियोजन विधेक प्रतिनिधि सभाको आगामी बैठकमा पेश नहुन्जेलसम्म अनिवार्य उपस्थित हुन ह्वीप जारी भएको बताए ।

‘अब ९ गतेदेखि प्रारम्भ हुने सबै बैठकहरुमा विनियोजन विधेक निणयार्थ प्रस्तुत नहुँदासम्मका लागि सबै माननिय सदस्यहरुको अनिवार्य उपस्थिति हुनुपर्छ भनेर आजको संसदीय दलको बैठकले निर्देश गरेको छ,’ लेखकले भने ।

कांग्रेसले बजेटका सन्दर्भमा लिएने पोजिसनबारे त्यहीबेला निर्णय गर्ने पनि नेता लेखकले बताए ।

उनले प्रतिपक्षमा रहेको कांग्रेसले जनताका सवाल, जनजीविकाका मुद्दा, देश र जनताका विषयलाई सघनरुपमा संसद्मा उठाउनुपर्ने बताए ।

पछिल्ला बैठकमा कांग्रेसका सांसदहरू कम उपस्थित हुँदा ती विषयले कम महत्व पाएको पनि बताए । आजको बैठकले संसदमा देश र जनताबारे निरन्तर आवाज उठाउन पनि निर्देशन दिएको उनले बताए ।

बजेटबारे सत्तारुढ दलकै सांसदहरूले कुरा उठाएको उनले स्मरण गराए । मन्त्रालयगत विनियोजन बेठीक रहेको उनले बताए ।

बजेटबाहेकका समसामयिक विषयमा पनि कांग्रेसले क्रियाशीलतापूर्वक विषय उठाउने पनि उनले बताए ।

नेता लेखकले कांग्रेसले सहकारीबारे विषय उठाएर नै संसदीय समिति बनेको बताए । संसदीय समिति बनेको उक्त सहकारीको विषयमा कुनै छलफल नभएको उनले प्रष्ट पारे ।