काठमाडौं – राष्ट्रिय स्वतन्त्र पार्टी (रास्वपा)ले दोस्रो स्थापना दिवसका अवसरमा केन्द्रीय कार्यालय च:मतीमा आयोजना गरेको चियापान कार्यक्रममा स्वदेशी उत्पादनको पनि स्टल राखिएको छ ।

दोस्रो स्थापना दिवसको अवसरमा शुक्रबार च:मतीमा आयोजित चियापान कार्यक्रममा सहभागीहरूका लागि नेपाली मौलिक उत्पादनका स्टल राखिएको हो ।

ती स्टलको प्रधानमन्त्री पुष्पकमल दाहाल प्रचण्डसहितले अवलोकन गरेका छन् ।

ती स्टलमा नेपालमा प्रतिबन्धित गाँजाबाट उत्पादति कपडा, जुत्तादेखि विभिन्न प्रकारमा सामग्रीहरू राखिएको छ ।

स्टल राखेका एकजना व्यवसायी प्रदीप कार्कीका अनुसार गाँजासहितका यी सबै सामग्रीहरू नेपालमै उत्पादन गरिएका हुन् ।

उनले सरकारद्वारा प्रतिबन्धित गाँजाका सामग्रीको व्यवसाय जोखिम मोलेर गरिरहेको बताएका छन् ।

‘मलाई सरकारले यहीँबाट समातेर लान पनि सक्छ । तर मैले जोखिम मोलेर गाँजाबाट यस्ता उत्पादन गर्न सकिन्छ भनेर व्यवसाय गरिरहेको छु’, उनले भने ।

यो स्टल राख्नका लागि रास्वपाले सहयोग गरेकोमा उनले धन्यवाद दिएका छन् । कार्कीले सुकाइएको गाँजाको रेसाबाट बनाइएका जुत्ता, झोला र रुमाल लगायत सामग्री स्टलमा राखेका छन् ।

अहिले रास्वपा सभापति रवि लामिछाने उपप्रधान तथा गृहमन्त्री छन् । उनीमातहतका प्रहरी अहिले पनि गाँजालाई लागुऔषध भन्दै उखेल्ने र समात्ने अभियानमा लागिरहेका छन् ।