काठमाडौँ– बलिउड नायक रणभीर सिंह र नायिका दीपिका पादुकोणले चलचित्रबाट लामो समयका लागि विश्राम लिने भएका छन् । पहिलो सन्तानको अभिभावक बन्नका लागि यो जोडीले विश्राम लिन लागेको बुझिएको छ ।

रणभीर र दीपिकाले गत फेब्रुअरीमा विवाहको ६ वर्षपछि अभिभावक बन्न लागेको जानकारी गराएका थिए । भारतीय मिडियाका अनुसार यो वर्षको अन्तिममा दीपिकाले पहिलो सन्तानलाई जन्म दिँदै छिन् ।

गर्भवती भएसँगै दीपिकाले सम्झौता गरेका सबै काम पूरा गरिसकेकी छिन् । रणभीर पनि पाइपलाइनमा भएका फिल्महरू छिटै सक्ने र तत्काल कुनै नयाँ फिल्ममा सम्झौता नगर्ने योजनामा रहेको भारतीय सञ्चार माध्यम अमर उजालले जनाएको छ ।

श्रीमती र पहिलो नवजात सन्तानसँग समय बिताउनका लागि रणभीर विश्रामको योजनामा रहेको बुझिएको छ ।

यो जोडीले सामाजिक सञ्जालमा निलो र गुलाबी रङका साना जुत्ता, टोपी तथा बेलुनकाे फोटो सार्वजनिक गरेको छ । उनीहरूले सेप्टेम्बर महिनामा पहिलो सन्तानको आगमन हुने पनि संकेत गरेका छन् ।

यो जोडीले निलो र गुलाबी रङको बच्चाको लुगा सेट सार्वजनिक गर्नुलाई धेरै सामाजिक सञ्जाल प्रयोगकर्ताले जुम्ल्याहा बच्चाको जन्म दिन लागेको भनेर संकेत दिएको रुपमा पनि लिएका छन् । यद्यपि यो जोडीले कुनै प्रतिक्रिया दिएको छैन ।