काठमाडौं- प्रधानमन्त्री पुष्पकमल दाहाल प्रचण्डले चौथो पटक विश्वासको मत लिँदा नेकपा एमालेका दुई सांसद अनुपस्थित रहे ।

एमालेका ७९ जना सांसद रहेकोमा ७६ मत प्रधानमन्त्रीको पक्षमा खस्यो । नक्कली शरणार्थी प्रकरणमा मुद्दा चलेर निलम्बनमा रहेकाले एमाले सांसद टोपबहादुर रायमाझीलाई मताधिकार छैन । उनी हाल जेलमा छन् ।

त्यस्तै अर्का एमाले सांसद बसन्त नेम्वाङ अस्वस्थ रहेकाले लामो समयदेखि उपचाररत छन् । पाँचथरका उनी प्यारालाइसिसको उपचारका क्रममा छन् ।

उता एमालेबाट निर्वाचित देवराज घिमिरे सभामखु रहेकाले उनले मत प्रयोग गर्न पाउँदैनन् ।

त्यस्तै नेकपा एकीकृत समाजवादीका सांसद हाल युरोप यात्रामा रहेकाले मतदानमा सहभागी भएनन् ।

नागरिक उन्मुक्तिका पार्टीका गंगाराम चौधरी पनि संसद्‍मा अनुपस्थित रहे । नाउपामा रेशम चौधरी पक्षधर उनी संसद्‍मै अनुपस्थित रहे ।

विश्वासको मतमा अनुपस्थित
१. प्रकाश ज्वाला (नेकपा एकीकृत समाजवादी)- युरोप यात्रामा
२. गंगाराम चौधरी (नागरिक उन्मुक्ति पार्टी)
३. वसन्त नेम्बाङ (नेकपा एमाले) – बिरामी
४. टोपबहादुर रायमाझी-(निलम्बन)