काठमाडौं- अर्थमन्त्री एवम् नेपाली कांग्रेसका प्रवक्ता डा. प्रकाशशरण महतले बैंक तथा वित्तीय संस्थाबाट घरजग्गा क्षेत्रमा प्रवाह भएको कर्जाको भुक्तानी शिथिल भएको र परिणमस्वरुप खराब कर्जाको अंश बढेको जनाएका छन् ।

ललितपुरको गोदावारीमा जारी पार्टीको महासमिति बैठकमा डा. महतले पेश गरेको प्रतिवेदनमा बैंक तथा वित्तीय संस्थामा खराब कर्जाको अंश बढ्दा वितरणयोग्य मुनाफा पनि घटेको जनाइएको छ । उनले प्रतिवेदनमा मुलुकको अर्थतन्त्रमा पुँजीगत बजेटको न्यूनता र बैंक तथा वित्तीय संस्था तथा सहकारीको समस्या प्रमुख चुनौतिका रुपमा रहेको औँल्याएका छन् ।

प्रतिवेदनमा उनले समष्टिगत आर्थिक परिसूचकहरु अनुकूल भएपनि राजस्वको अपेक्षित वृद्धिदर हासिल हुन नसक्दा सार्वजनिक वित्त व्यवस्थापन चुनौतिपूर्ण रहेको उल्लेख गरेका छन् ।

त्यसैगरी, ठूलो दायित्व र न्यून पुँजीगत बजेट तथा कार्यान्वयन गर्ने निकायहरुको न्यून खर्च गर्ने क्षमता, वन क्षेत्रको जग्गा प्राप्तिलगायत आयोजनाको पूर्वतयारी सम्बन्धमा रहेको जटिलता र व्यवहारिक कठिनाइले विकास आयोजनाहरु गुणस्तरीय र तोकिएको समयमा सम्पन्न गर्न नसकिएको पनि प्रतिवेदनमा उल्लेख छ ।