काठमाडौं– संस्कृति, पर्यटन तथा नागरिक उड्डयनमन्त्री सुदन किरातीले नेपाल वायुसेवा निगमको सञ्चालन करार व्यवस्थापनबाट हुने बताएका छन् । 

डोल्पो समाजको रजत जयन्ती एवं भवन उद्घाटनका अवसरमा शनिबार काठमाडौंमा आयोजित कार्यक्रममा मन्त्री किराँतीले निगम यही व्यवस्थापनबाट नचल्ने भन्दै करार व्यवस्थापनबाट निगमलाई सञ्चालन गर्ने गरि अध्ययन कार्यदल बनाइने बताएका हुन् । यही आर्थिक वर्षमा पर्यटक गौरवको क्षेत्रहरू पहिचान गरि घोषणा गर्ने, पर्यटनका सुत्रहरु निर्माण गर्नका लागि संस्कृति नीति तयार गर्ने र पर्यटन ऐन संशोधन गरिने उनले बताए ।

मन्त्री किराँतीले बिमास्थल सञ्चालन, व्यवस्थापन र निर्माणका लागि काठमाडौं लगायत भैरहवा पोखराका साथै नयाँ विमानस्थल निर्माण गर्ने कार्यका लागि पिपिपि मोडलमा जाने जिकिर गरे । यसका लागि अध्ययन समिति छिटै बनाउने उनको भनाइ छ । उनले १० वर्षमा ३५ लाख पर्यटन भित्राउन केही न केही जोखिम लिनै पर्ने उल्लेख गरे । 

यसअघि पर्यटनको योजना बनेपनि रोडम्याप नबनेकाले आफले बनाउन खोजेको उनले बताए । त्यस्तै मन्त्री किराँतीले अहिलेको संविधान अनुसार सबै धर्म संस्कृति बराबर भएकाले सबैले सबैको अस्तित्वलाई  मान्नुपर्ने बताए । 

उनले माथिल्लो डोल्पामा पर्यटक भित्राउन आधारभूत सूचना र वासस्थानको व्यवस्था गर्नुपर्ने बताए । कार्यक्रममा डोल्पो समाजका अध्यक्ष लगायतका बिभिन्न व्यक्तिहरूलाई सम्मान गरिएको थियो । डोल्पो समाज निमा रिन्पोछेद्वारा सन १९९७ मा स्थापना गरिएको थियो । 

राजधानीमा बसोबास गर्ने डोल्पा समूदायहरुका लागि बिभिन्न धार्मिक तथा सामाजिक कार्यहरू आयोजना गर्न गुम्बा र सामुदायिक हलहरुको आवश्यकता देखेर डोल्पो समाजको गुम्बा र सामुदायिक भवन निर्माण गरिएको निमा रिन्पोछेले बताए ।