काठमाडौं– साउन १८ गतेबाट प्रदर्शनमा आउने फिल्म ‘मोदीबेनी’को ट्रेलर सार्वजनिक गरिएको छ। निर्माण पक्षले बिहीबार नयाँ बानेश्वरको एक हलमा कार्यक्रमको आयोजना गरी ट्रेलर सार्वजनिक गरेको हो । 

ट्रेलरले फिल्ममा प्रेम, कमेडी, र पारिवारिक कथा रहेको बताउँछ । साथै, केही दृश्यहरू ‘सरप्राइजिङ’ पनि छन् । ट्रेलरमा अभिनेत्री वर्षा सिवाकोटी अभिनेता अमर प्रताप श्रेष्ठको प्रेमिकाको रुपमा देखिएकी छन् । अन्त्यमा उनको भयंकर रूपले दर्शकमा कौतुहलता सिर्जना गर्छ । 

ट्रेलरमा नायिका रेजिना उप्रेतीलाई भने वृद्ध महिलाको भूमिकामा देख्न सकिन्छ । उनी वर्षाको आमाको भूमिकामा छिन् । यस फिल्ममा अभिनेता सरोज खनालले ‘लुक्स’ परिवर्तनमा मिहिनेत गरेको देखिन्छ । यद्यपि उनी पनि वृद्धकै भूमिकामा छन् । 

अभिनेताद्वय प्रवीण खतिवडा र जीवन भट्टराईको भूमिकाले ट्रेलरलाई थप रोमाञ्चक बनाएको छ । यही फिल्ममार्फत अभिनेतृ उप्रेती दशकपछि अभिनयमा फर्कँदै छिन् । त्यस्तै, नायक अमरप्रतापको यो डेब्यू फिल्म हो । 

शङ्कर कोइरालाले निर्देशन गरेको यस फिल्ममा वर्षा, अमर, सरोज खनाल, प्रवीण खतिवडा, रेजिना उप्रेती, जीवन भट्टराईसहित  दिलीप केसी, कमलमणि नेपाल, स्नेहा भट्टराई, सुब्रतराज आचार्य लगायतको अभिनय रहेको छ ।