काठमाडौं– फिल्म ‘छक्का पञ्जा’को पाँचौँ सिक्वेल ‘छक्का पञ्जा ५’ को छायाङ्कन अन्तिम चरणमा पुगेको छ । लेखक एवम्‌ निर्माता दीपकराज गिरीका अनुसार अब गीतको छायाङ्कन मात्रै बाँकी रहेको हो ।

दीपकले खबरहबसँग भने, ‘अब अन्तिम नै भयो भन्दा हुन्छ, गीतको मात्रै छायाङ्कन बाँकी छ, त्यो पनि छिटै हुन्छ ।’

उनका अनुसार काभ्रेमा अन्तिम चरणको छायाङ्कन सकेर बुधबार साँझ फिल्म सुटिङ युनिट काठमाडौं फर्किएको हो ।

निर्माण टिमले कलाकारहरूको नाम भने अहिलेसम्म गोप्य नै राखेको छ । गिरी स्वयम्‌, केदार घिमिरे ‘माग्ने बूढा’ र वर्षा सिवाकोटी गरी तीन कलाकारको मात्रै सार्वजनिक गरिएको छ ।

जेठ १७ गतेबाट फिल्मको छायांकन सुरु भएको थियो । काभ्रे, सिन्धुली र पोखराका विभिन्न स्थानमा छायाङ्कन भएको बुझिएको छ ।

यो फिल्म अन्य श्रृङ्खलाभन्दा पूर्णतः भिन्न रहने गिरीको दाबी छ । आमा सरस्वती मुभिज र आईएमईको प्रस्तुतीमा निर्माण हुने यस फिल्मको निर्देशक दीपाश्री निरौला हुन् ।

फिल्मको प्रदर्शन मिति आउँदो असोज २४ गते फूलपातीका दिनलाई तोकिएको छ ।