काठमाडौं – जिल्ला प्रहरी कार्यालय कास्कीले सहकारी ठगी प्रकरणमा राष्ट्रिय स्वतन्त्र पार्टी (रास्वपा) सभापतिविरुद्ध जारी गरेको पक्राउ पुर्जी सार्वजनिक भएको छ ।

जिल्ला अदालत कास्कीबाट शुक्रबार नै पक्राउ अनुमति लिइ लामिछानेसहित १४ जनाविरुद्ध एकै दिन पक्राउ पुर्जी जारी भएको हो । ‘मानिस पक्राउ गरी पठाइदिने सम्बन्धमा’ विषयक पक्राउ पुर्जीमा जाहेरीवाला कृष्णप्रसाद जैसीको नाम समेत उल्लेख छ ।

पुर्जीमा लेखिएको छ-

प्रस्तुत विषयमा कृष्णप्रसाद जैसी समेतको जाहेरी तथा प्रहरी प्रतिवेदनले वादी नेपाल सरकार प्रतिवादी सूर्यदर्शन बचत तथा ऋण सहकाारी संस्था लि. पोखराको पूर्वअध्यक्ष एवम्‌ सञ्चालक गितेन्द्र बाबु राई समेत भएको सहकारी ऐनले परिभाषित ठगी तथा संगठित अपराध सम्बन्धी मुद्दा अनुसन्धानको सिलसिलामा निम्न नामथर वतन गरेका व्यक्तिलाई पक्राउ गर्न सम्मानित कास्की जिल्ला अदालतबाट मिति २०८१/०७/०२ गते पक्राउ अनुमति जारी भई आएको हुँदा पक्राउ अनुमति यसै साथ संलग्न राखी पठाइएको छ । प्राप्त भए पश्चात निज प्रतिवादीको खोजतलास गरी फेला परेमा पक्राउ गरी यस कार्यालयमा पठाइदिनुहुन अनुरोध गरिएको छ ।’ 

पक्राउ पुर्जीमा उल्लेखित ब्यहोराअनुसार लामिछानेलाई ठगी र संगठित अपराध गरी दुईवटा मुद्दा लाग्ने देखिएको छ ।

लामिछानेसहित विशाल तामाङ, नवीन अछामी, रविना रिमाल, असरफ अली सिद्दिकी, दीपक लामा, अनन्तबाबु राई, रामबहादुर खनाल, देवेन्द्रबाबु राई, विज्ञान राई, ओमप्रकाश गुरुङ, वीरबहादुर रानाभाट, दीपा न्यौपाने र कल्पनाकुमारी श्रेष्ठविरुद्ध पक्राउ पुर्जी जारी भएको हो ।