काठमाडौँ– भारतमा नायकनायिकाको पारिश्रमिकको विषय सधैँ चर्चामा रहन्छ । सबैभन्दा बढी पारिश्रमिक लिने भारतीय नायक सलमान खान हुन् । उनले एउटा फिल्मबाट एक सय करोडभन्दा बढी लिने गर्छन् ।

एउटा फिल्ममा काम गरेर सय करोडभन्दा बढी पारिश्रमिक लिने बलिउड नायकहरू अमिर खान, अक्षय कुमार, ऋतिक रोशनलगायत छन् । अर्थात् अहिलेको अवस्थामा बलिउडमा पारिश्रमिकबापत एक सय करोड लिनु सामान्य भइसकेको छ । पछिल्लो समय चर्चामा आएका नायक कार्तिक आर्यनले समेत ३५ करोडसम्म पारिश्रमिक बुझ्छन् ।

सन् १९९२ को दौरानमा बलिउडमा अभिनेता अमिताभ बच्चनको दबदबा थियो । साउथ फिल्म इन्डस्ट्रीमा रजनीकान्तको उदय भइरहेको थियो । तर यी दुवै एक करोड पारिश्रमिक लिने पहिलो अभिनेता बन्न सकेनन् ।

को थिए एक करोड पारिश्रमिक लिने पहिलो नायक ?

सन् १९९२ मा सर्वाधिक चल्तीका नायक अमिताभले बढीमा ९० लाख पारिश्रमिक लिन्थे । सो समयमा साउथका एक नायकले एक करोड २५ लाख पारिश्रमिक लिएर इतिहास रचेका थिए । उनको नाम हो– चिरञ्जीवी ।

उनले इतिहास रचेर पारिश्रमिक लिएको फिल्म ‘आपाडबन्दभुदु’ हो । यसपछि उनी भारतमा सबैभन्दा बढी पारिश्रमिक लिने हिरो बनेर चर्चा कमाएका थिए ।

भारतीय सञ्चार माध्यम एनडीटीभीका अनुसार त्यस समय पत्रपत्रिकाले चिरञ्जीवीलाई अमिताभ भन्दा ठूलो नायकका रुपमा चित्रण गरेका थिए । यही घटनाले उनलाई साउथमा नायकका रुपमा स्थापित गर्‍याे ।

चिरञ्जीवी अहिलेका सफल नायक रामचरणका बाबु हुन् ।

उनले एक सय करोड पारिश्रमिक बुझेपछि अन्य नायकहरूले पनि रेट बढाएका थिए । कमल हसन सन् १९९४ एक करोड लिने दोस्रो नायक हुन् । सन् १९९६ बाट रजनिकान्तले पनि एक करोड पारिश्रमिक बुझ्न लागे भने अमिताभले त्यसपछि मात्रै एक करोड पारिश्रमिक लिन लागेका हुन् ।