काठमाडौं – काठमाडौंको विष्णुमती र धोबिखोलामा जलसतहले सतर्कता तह पार गरेको छ ।

आइतबार साँझ जल तथा मौसम विज्ञान विभागले विष्णुमती र धोबिखोलामा जलसतह बढेकाले सोमबार बिहान १० बजेसम्म सतर्कता अपनाउन अनुरोध गरेको छ ।

आइतबार राति ८ः५० बजे विष्णुमती नदीको गोंगबु जल मापन केन्द्रमा र धोबिखोला कपन जल मापन केन्द्रमा जलसतह सतर्कता तह पार गरेको हो । विभागले त्यो क्षेत्र नजिकको सडक भएर यात्रा गर्नेहरूलाई भोलि बिहान १० बजेसम्म उच्च सतर्कता अपनाउन आग्रह गरेको छ ।

विभागका अनुसार उपत्यकालगायत केही क्षेत्रमा अहिले पनि वर्षा भइरहेको छ । आइतबार साँझ उपत्यकाको गोङ्गबु माथिल्लो क्षेत्र र बूढानीलकण्ठ आसपासका क्षेत्रमा आज वर्षा भएको थियो ।

हाल देशभर साधारणतया बदली रहेको तथा कोशी, बागमती, गण्डकी र लुम्बिनी प्रदेशका केही स्थानमा हल्कादेखि मध्यमवर्षा भइरहेको छ ।