काठमाडौं – पाथीभरा केबलकार निर्माण विरोध गर्दै भोलि र पर्सी तमोर कोरिडोर बन्द घोषणा भएको छ । विभिन्न ६ संस्थाले बुधबार र बिहीबार मेची राजमार्गको तमोर करिडोर अन्तर्गत ताप्लेजुङ खण्डमा यातायात बन्द आह्वान गरेका हुन्‌ ।

‘ताप्लेजुङ जिल्लामा अवस्थित पवित्र आस्था केन्द्र आध्यात्मिक स्थल मुक्कम्लुङ युमामाङ देवस्थललाई राज्यसत्ता र शक्तिको आडमा अतिक्रमण गरी पाथिभरा बनाइएको र त्यहाँ केबलकार बनाउन लागिएको बिरुद्धमा विगतदेखि नै हामी आन्दोलनरत रहेको कुरा सर्वविदितै छ,’ बन्द आह्वानकर्ताद्वारा जारी विज्ञप्तिमा लेखिएको छ ।

स्थानीय जनताको भावना र मागलाई कुल्चेर मुक्कुमलुङ क्षेत्रमा जबरजस्त केबलकार बनाउन डकैत शैलीमा आधारातमा रुख कटान गर्न खोजिएको आरोप बन्दकर्ता संघसंस्थाले लगाएका छन्‌ ।

चोरी दाउमा बहुमूल्य जडिबुटीजन्य वनस्पति लगायत ढकमक्क फुलिरहेका लाखौँ राष्ट्रिय फूल लालिगुराँस ढालेर उजाड बनाइएको पनि उनीहरूले दाबी गरेका छन्‌ । केबलकार निर्माण योजना रद्द गर्न र वन फडानीमा संलग्न व्यक्तिहरुले सार्वजनिक रुपमा माफी माग्न पर्ने माग उनीहरूको छ ।

मुक्कुमलुङ संरक्षण संयुक्त सङ्घर्ष समिति, पाथीभरा केaलकार खारेजी संयुक्त सङ्घर्ष समिति, किरात याक्थुङ चुम्लुङ सङ्घीय समिति, लिम्बु थरगत संस्था (याक्थुङ सयङ) मूल अभियान, पहिचान सहितको प्रदेश नं.१ प्रदेश पुनः  नामाङ्कन अभियान समिति, किरात धर्म तथा साहित्य उत्थान सङ्घ मोरङ र मुक्कमलुङ तान्से:प्‌ चुम्भोले बन्द आह्वान गरेका हुन्‌।