काठमाडौं– नेपालमा लगानी प्रवर्द्धन तथा लगानी साझेदारीका लागि ‘डुइङ बिजनेस वीद फिनल्यान्ड’ कार्यक्रम भएको छ ।

इन्स्टिच्युट फर स्टाटेजिक एन्ड सोसियो–इकोनोमिक रिसर्च (आइएसएसआर) को आयोजनामा मंगलबार काठमाडौंमा फिनल्यान्डका लगानीकर्ता तथा उद्यमीहरूको सहभागितामा नेपालमा लगानी सम्भाव्यताको विषयलाई लिएर सो कार्यक्रम भएको हो ।

फिनल्यान्डका विभिन्न ९ वटा कम्पनी, नेपाली उद्योगी तथा अन्य विशिष्ट प्रतिनिधिहरूको सहभागितामा दुई वटा सेसनमा भएको कार्यक्रममा विशेषगरी नेपालमा लगानीको सम्भावनाको विषयमा छलफल भएको थियो ।

दोस्रो सेसन तथा वृहत् छलफल कार्यक्रममा पूर्व अर्थमन्त्री तथा नेपाली कांग्रेसका प्रवक्ता प्रकाशशरण महतले नेपालमा उद्योग तथा व्यवसायको क्षेत्रमा लगानीको ठूलो अवसर भएको उनले बताए । साथै उनले भारतलाई बजार केन्द्रित गरेर पनि नेपालमा उद्योग तथा व्यवसायमा लगानी गर्न सकिने बताए ।

फिन आइटीका कग्निट नेपाल लिमिटेडका मनिषजंग खड्काले नेपालमा उद्यम गर्दा खास गरी व्यूरोक्रेसी प्रणालीबाट ढिलाइ तथा चुनौती व्यहोनुपर्ने स्थिति रहेको बताए ।

कार्यक्रमको आयोजक संस्था आइएसएसआरका निर्देशक नरेश श्रेष्ठले नेपालको उद्योग तथा व्यवसाय क्षेत्रमा प्रविधि, प्याकेजिङ, वित्तीय, उत्पादन लगायतका विषयमा साझेदारी गर्न सकिने राम्रो सम्भावना रहेको बताए ।

साथै, नेपाल फिनल्यान्ड चेम्बर अफ कमर्सका महासचिव विशेष श्रेष्ठले आफ्नो फिनल्यान्डको व्यापार अनुभव साझेदारी गर्दै नेपालको उद्योग तथा व्यवसायको क्षेत्रमा सहकार्य गर्न सकिने अवस्था रहेको सकारात्मक विचार राखेका थिए ।

कार्यक्रमको सुरुवात अर्थात् पहिलो सेसनमा फिनल्यान्ड राजदूतावासकी हेड अफ को–अपरेसन सारा अलानेनले स्वागत मन्तव्य राखेकी थिइन् । त्यस्तै, फिन फन्डका जुलियन ब्लुमले फिन पार्टनरका बारेमा जानकारी गराएका थिए ।

त्यस्तै, उद्योग वाणिज्य तथा आपूर्ति मन्त्रालयका सहसचिव रामचन्द्र तिवारीले द्विपक्षीय व्यापारको विषयमा जानकारी गराएका थिए ।

नेपाल–फिनल्यान्ड लगानी प्रवर्द्धनको विषयमा आयोजना गरिएको यो तेस्रो कार्यक्रम हो ।

यसअघि सन् २०१७ र २०१९ मा सो कार्यक्रम गरिएको थियो । सो कार्यक्रमले नेपालमा लगानी प्रवर्द्धनको लागि सहज वातावरण बनाउन सकारात्मक भूमिका खेल्ने अपेक्षा गरिएको छ ।